ޖަރުމަނުގެ ބުންޑަސްލީގާގައި ރޭ ބެޔާން ލެވަކޫސެންއިން ބެޔާން މިއުނިކް ބަލިކޮށް، އެ ޓީމުން ލީގުގައި ފަސް ޕޮއިންޓުގެ ލީޑެއް ނަގައިފިއެވެ. ލެވަކޫސެންގެ ބޭއެރީނާގައި ކުޅުނު މި މެޗު އެ ޓީމުން ކާމިޔާބުކުރީ 3-0 އިންނެވެ.

ލެވަކޫސެން ލީޑު ނެގީ މެޗުގެ ވަރަށް ކުރީކޮޅުއެވެ. އެއީ ބެޔާނުން ލޯނު އެއްބަސްވުމެއްގެ ދަށުން ލެވަކޫސަންއަށް ބަދަލުވި ޖޮސިޕް ސްޓެނިސިޗް 18 ވަނަ މިނެޓުގައި ކާމިޔާބުކުރި ގޯލެކެވެ. މިއީ ލެވަކޫސެންގެ ޖާޒީގައި އޭނާ ކުޅެންއެރި ފުރަތަމަ މެޗު ވެސް މެއެވެ.

ލެވަކޫސެން އިން ދެވަނަ ގޯލު ކާމިޔާބުކުރީ ދެވަނަ ހާފުގެ 4 ވަނަ މިނެޓުގައެވެ. މިއީ އެ ޓީމުގެ ފަހަތަށް ކުޅޭ އަލެހާންޑްރޯ ގްރިމާލްޑޯ ބެޔާންގެ ގޯލުގެ މަތީ ދާގަނޑަށް ބޯޅަ ފޮނުވާލައިގެން ކާމިޔާބުކުރި ގޯލެކެވެ. ލެވަކޫސަންގެ ފަހު ގޯލު ކާމިޔާބުކުރީ ފަހު ހާފު ކުޅެން ނިކުތް ޖެރެމީ ފްރިމްޕޮންގްއެވެ. މި ގޯލު ފެނިގެން ދިޔައީ މެޗުގެ އިތުރު ވަގުތުއެވެ.

މި މޮޅާ އެކީ 21 މެޗުން ލިބުނު 55 ޕޮއިންޓާއެކު ލެވަކޫސެން އެއްވަނައިގައި އޮތްއިރު، ދެވަނައިގައި އޮތް ބެޔާނަށް 21 މެޗުން ލިބިފައިވަނީ 50 ޕޮއިންޓެވެ.