ރައީސުލްމްހޫރިއްޔާގެ އަނިބިކަނބަލުން ފަޒްނާ އަޙްމަދު، ސޭޝެލްސްގެ ރައީސްގެ އަނބިކަނބަލުން ލިންޑާ ރާމްކަލާވަން އާއި މިއަދު ބައްދަލުކުރައްވައިފިއެވެ.

ދެބޭފުޅުންގެ މިބައްދަލުކުރެއްވުން މިއަދު އޮތީ، މުލީއާގޭގައެވެ.

މިބައްދަލުކުރެއްވުމުގައި ރައީސުލްޖުމްހޫރިއްޔާގެ އަނބިކަނބަލުން ދެއްކެވި ވާހަކަފުޅުގައި ވަނީ، ސޭޝެލްސްއާ ދިވެހިރާއްޖެއަކީ އެއްގޮތަށްވުރެ ގިނަ ގޮތުން އެއްގޮތް ކަންތައްތަކެއް ޙިއްޞާކުރާ ދެޤައުމުކަން ފާހަގަކުރައްވާފައެވެ. މީގެ އިތުރުން އެކަމަނާގެ ވާހަކަފުޅުގައި ވަނީ، ސީޝެލްސްގެ ރައީސްގެ އަނބިކަނބަލުން އެޤައުމުގެ ފަތުރުވެރިކަމުގެ ދާއިރާގައި ކުރައްވާފައިވާ ނަމޫނާ މަސައްކަތްތަކާއި ހޯއްދަވާފައިވާ ކާމިޔާބީތައް ފާހަގަކުރައްވައި، އެކަމަނާއަކީ އަންހެނުން އިސްނަގައި ކުރިއަށް ދިޔުމަށް ނަމޫނާ ކަނބަލެއް ކަމުގައި ވިދާޅުވިއެވެ.

މި ބައްދަލުކުރެއްވުމުގައި ސޭޝެލްސްގެ ރައީސްގެ އަނބިކަނބަލުންވެސް ވަނީ، ފަތުރުވެރިކަމުގެ ދާއިރާއިން އެކަމަނާގެ ތަޖުރިބާތައް ހިއްޞާކުރައްވައި އެދާއިރާގައި އަންހެނުންނަށް ހުރި ފުރުޞަތުތަކާއި ގުޅޭ ގޮތުންވެސް ވާހަކަފުޅު ދައްކަވާފައެވެ. 

މީގެ އިތުރުން، ދައުލަތުގެ ބެލުމުގެ ދަށުން ކުޑަކުދިންނަށް ރައްކާތެރިކަންދީ ބެެލެހެއްޓުމާއި، ގުޅޭ ގޮތުންނާއި އެދާއިރާއިން ކުރިމަތިވާ ގޮންޖެހުންތައް ހައްލުކުރެއްވުމާއި ގުޅޭކަންކަމުގެ މައްޗަށްވެސް ދެބޭފުޅުން ވާހަކަފުޅުގައި އަލިއަޅުއްވައި ލެއްވެވިއެވެ.

ރައީސުލްޖުމްހޫރިއްޔާގެ އަނބިކަނބަލުންނާއި، ސޭޝެލްސްގެ ރައީސްގެ އަނބިކަނބަލުންގެ މިބައްދަލުކުރެއްވުމަށްފަހު، އެދެބޭފުޅުން ވަނީ، ހުޅުމާލޭގައި ހުންނަ ދައުލަތުގެ ބެލުމުގެ ދަށުން ކުޑަކުދިން ބަލަހައްޓާ މަރުކަޒު، ފިޔަވައްޗަށް ޒިޔާރަތްކުރައްވައި އެތަން ބައްލަވާލައްވާފައެވެ.

ސޭޝެލްސްގެ ރައީސްގެ ދެކަނބަލުން ރާއްޖެއަށް ކުރައްވަމުން ގެންދަވާ ފުރަމާނަ ދަތުރުފުޅަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ދަޢުވަތަކަށް ކުރައްވާ ފުރަމާނަ ދަތުރުފުޅެކެވެ.