ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުސަތުތައް ފަހިކޮށްދިނުމުގެ ގޮތުން ޚާއްސަ ފެސްޓިވަލެއް ބޭއްވުމަށް ނިންމަވާފައިވާކަމަށް އިޖުތިމާޢީ އަދި އާއިލީ ތަރައްގީއާއި ބެހޭ ވުޒާރާއިން ވިދާޅުވެއްޖެއެވެ.

ސްކޫލް ނިމިގެން ނިކުންނަ ނުކުޅަދުންތެރިކަން ހުންނަ ދަރިވަރުންނަށް މުޖްތަމައުގެ ތެރޭގައި މިހާރު ގިނަ ފުރުސަތުތަކެއް ފަހިވެފައިނުވާކަމަށް އެ ވުޒާރާއިން ވިދާޅުވެއެވެ.

ފޭސްބުކް މެދުވެރިކޮށް ރައްޔިތުންގެ ހުރި ކަންބޮޑުވުންތައް އަޑުއައްސަވައި، ކުރިއަށްގެންދިޔަ ޕްރޮގްރާމެއްގައި ވާހަކަދައްކަވަމުން ވަޒީރު އައިޝަތު ޝިހާމް ވިދާޅުވީ، ނުކުޅަދުންތެރިކަން ހުންނަ ފަރާތްތަކަށް އިތުރަށް ކިޔެވުމަށް ނުވަތަ ވަޒީފާތަކަށް ވަނުމުގެ ފުރުސަތު ހޯދައިދޭން ޚާއްސަ އިންތިޒާމެއްގެ ތެރެއިން މަސައްކަތްކުރަންޖެހޭކަމަށެވެ.

"ސަރުކާރުގެ ގިނަ އޮފީސްތަކާއި މުވައްސަސާތަކުގައި ނުކުޅެދުންތެރިކަން ހުންނަ ފަރާތްތަކަށް ލުއިފަސޭހަކޮށް އިންތިޒާމްތައް ހަމަޖެހިފައިނުވޭ. އަދި މިކަން ރަނގަޅުކޮށް ހުރިހާ ފަރާތްތަކަށްވެސް ފަސޭހައިން އުޅެވޭނެ ފަދަ މާހައުލަކަށް މަސައްކަތުގެ މާހައުލު ހެދުމަށްޓަކައި ސަރުކާރުން އިތުރަށް މަސައްކަތްކުރާނެ." ވަޒީރު ވިދާޅުވިއެވެ.

މީގެކުރީގެ ސަރުކާރުތަކުންވެސް ވަނީ ނުކުޅެދުންތެރިކަން ހުންނަ ފަރާތްތަކަށް ފަސޭހައިން ވަޒީފާ ލިބޭނެ މަގު ފަހިކޮށްދިނުމަށް ގިނަ މަސައްކަތްތަކެއް ކުރައްވާފައެވެ. އަދި ބައެއް ސަރުކާރު އޮފީސްތަކުގައި އެފަދަ ކުދިން ވަޒީފާ އަދާކުރަމުންވެސް ދެއެވެ.