އިޤުތިޞާދީ ދަތިކަމުގެ ސަބަބުން އަތޮޅުތަކުގެ ރަށްރަށުގެ ތަރައްޤީއަށް ކުރަން ހުރި ކަންކަން ކުރެވެން ނެތްކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފާހަގަ ކުރައްވައިފިއެވެ.

ރައީސުލްޖުމްހޫރިއްޔާ މިކަން ފާހަގަކުރެއްވީ، އެމަނިކުފާނު ވެރިކަމާއި ހަވާލުވެވަޑައިގެންނެވުމަށްފަހުގައި އަތޮޅުތަކުގެ ރަށްރަށަށް ކުރައްވާ ފުރަތަމަ ދަތުރުފުޅުގައި މިއަދު ކޮޅުމަޑުލު ދިޔަމިގިއްޔަށް ވަޑައިގެން އެރަށުގެ ރައްޔިތުންނާއި ބައްދަލު ކުރައްވައި ދެއްކެވި ވާހަކަފުޅުގައެވެ.

ކޮޅުމަޑުލު ދިޔަމިގިއްޔަށް ރިޔާސީ އިންތިޚާބުގެ ތެރޭގައި ރައީސް ޑރ. މުޢިއްޒު ވަޑައިގެން އެރަށުގެ ތަރައްޤީއަށް ގިނަ ކަންތައްތަކެއް ކޮށްދެއްވުމަށް ވަޢުދުވެ ވަޑައިގެންނެވި ނަމަވެސް، މިއަދު ދިޔަމިގިލީގެ ރައްޔިތުންނާއި މުޚާތަބު ކުރައްވައި ވިދާޅުވީ، ޤައުމުގެ އިޤުތިޞާދީ ޙާލަތު އޮތް ގޮތް މުޅިރާއްޖޭގެ ތަރައްޤީއަށްވެސް ހުރަހަކަށް ވެފައިވާކަމަށެވެ.

ރައީސުލްޖުމްހޫރިއްޔާ ވިދާޅުވީ، މިސަރުކާރު އައުމަށްފަހުގައި ރަށްރަށުގައި ކުރީ ސަރުކާރުން ފަށާފައިވާ މަޝްރޫޢުތައް ހުއްޓިފައި އޮތުމުން އަލުން ފެށިކަމަށާއި އެހެންނަަމަވެސް އެކަންކަންވެސް އެކަށީގެންވާ ގޮތުގައި ކުރިއަށް ނުދަނީވެސް އިޤުތިޞާދީ ގޮންޖެހުންތަކުގެ ސަބަބުން ކަމަށެވެ. އެހެން ނަމަވެސް މިހާރު ސަރުކާރުން ހިންގާ އިޤުތިޞާދު ރިފޯމް ކުރުމުގެ ކަންކަމާއިއެކު ދައުލަތުގެ އާމްދަނީ އިތުރުކުރެވިގެން ދިޔުމުން، މާލަސްތަކެއް ނުވެ ރަށްރަށުގެ ތަރައްޤީއަށް ކުރަންހުރި ކަންކަން ވެސް ކުރެވިގެންދާނެ ކަމަށެވެ. އަދި ދިޔަމިގިލީގެ ތަރައްޤީއަށް ކުރުމަށް އެންމެ މުހިއްމު ކަންކަން މަޝްވަރާކުރެއްވުމަށްފަހު ތަރުތީބު ކުރެއްވުމަށްވެސް ރައީސުލްޖުމްހޫރިއްޔާ އެދިވަޑައިގެންނެވިއެވެ. އަދި ދިޔަމިގިއްޔަށް ވެވަޑައިގެންނެވި ވަޢުދުތައް ފުއްދަވާނެ ކަމަށާއި، ދިޔަމިއްޔާއި މަޑިފުށި ކޯޒްވޭއަކުން ގުޅާލުމުގެ މަސައްކަތްވެސް ކުރައްވާނެ ކަމަށެވެ.

ރާއްޖޭގެ އިޤުތިޞާދީ ޙާލަތު އަތޮޅުތަކުގެ ތަރައްޤީއަށް ހުރަހަކަށްވެފައިވާ ކަމުގައި ރައީސުލްޖުމްހޫރިއްޔާ ވިދާޅުވިއިރު، މިސަރުކާރު އައި ފަހުން ދައުލަތުގެ މާލިއްޔަތަށް އާމްދަނީ އިތުރުވާނެ ގޮތްތައް ނުހޯއްދަވައި، މާލެ ސަރަހައްދާއި އައްޑޫ ސިޓީގައި ތަރައްޤީގެ ބޮޑެތި މަޝްރޫޢުތަކެއް ވަނީ ޢިއުލާނު ކުރައްވާފައެވެ. އަދި ކޮޅުމަޑުލު ގުރައިދޫ އާއި ދާދިކައިރިން ތިމަރަފުށީގައި އެއާޕޯޓެއް އޮތް އިރު، މިއަހަރުގެ ބަޖެޓުގައި ހިމަނާފައި ނެތް ނަމަވެސް ގުރައިދޫގައި އެއާޕޯޓު އެޅުމުގެ މަސައްކަތް މިއަހަރު ފައްޓަވާނެ ކަމުގައި ރައީސުލްޖުމްހޫރިއްޔާ މިއަދު ވަނީ ވިދާޅުވެފައެވެ.