ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފު، ޔޫގެންޑާއަށް ކުރެއްވި ދަތުރުފުޅަށް މިލިޔަނެއްހައި ރުފިޔާ ޚަރަދުވި ކަމުގައި ރައީސުލްޖުމްހޫރިއްޔާގެ އޮފީހުން ވިދާޅުވެއްޖެވެ.

ރައީސުލްޖުމްހޫރިއްޔާ އާއި އެމަނިކުފާނުގެ ނައިބު ރާއްޖެއިން ބޭރަށް ކުރައްވާ ދަތުރުފުޅުތަކުގެ ޚަރަދު ތަފްސީލް ހާމަކުރުމަށް މިސަރުކާރުން ގެންގުޅޭ ސިޔާސަތުގެ ދަށުން މިއަދު ރާއްޖޭގެ މީޑިއާތަކާއި ރައީސުލްޖުމްހޫރިއްޔާގެ އޮފީހުން ހިއްޞާކުރި މައުލޫމާތުގައިވާ ގޮތުން، އެދަތުރުފުޅަށް، ޖުމުލަ 983،032.13ރ (ނުވަ ލައްކަ އައްޑިހަ ތިންހާސް ބައްތިރީސް ރުފިޔާތ ތޭރަ ލާރި) ޚަރަދުވެފައި ވެއެވެ.

އޭގެ ތެރެއިން އެންމެ ބޮޑު ޚަރަދެއް ހިނގާފައި ވަނީ ދަތުރުފުޅުގެ ޓިކެޓަށެވެ. މިގޮތުން 7 ބޭފުޅުން ޓިކެޓް ޚަރަދަށް އެކަނިވެސް، 650،847.36ރ ވަނީ ޚަރަދުކޮށްފައެވެ. މީގެ އިތުރުން ދަތުރުފުޅުގައި ވަޑައިގެންނެވި 7 ބޭފުޅުންނަށް ޕޮކެޓްމަނީގެ ގޮތުގައި ލައްކައެއްހައި ރުފިޔާ ވަނީ ދެއްވާފައެވެ.

ޖެނުއަރީ މަހުގެ 17 އިން 23އަށް ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް، ޔޫގެންޑާއަށް ކުރެއްވި ދަތުރުފުޅަކީ، 19 ވަނަ ނާމް ސަމިޓާއި، "ގުރޫޕް އޮފް 77 އެންޑް ޗައިނާ"ގެ 3ވަނަ ސަމިޓްގައި ބައިވެރިވެވަޑައިގެންނެވުމަށް ކުރެއްވި ދަތުރުފުޅެކެވެ.