އިސްލާމީ ޓީވީ ޗެނަލެއް އުފެއްދުމަށް ސަރުކާރުން މަސައްކަތް ކުރައްވަމުންގެންދަވާ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އެމަނިކުފާނުގެ ފުރަތަމަ ރިޔާސީ ބަޔާން މަޖިލީހަށް ހުށައަޅުއްވަމުންނެވެ.

ރައީސުލްޖުމްހޫރިއްޔާ ވިދާޅުވީ، އިސްލާމީ ޓީވީ ޗެނަލެއް އުފައްދަވަނީ، ރައްޔިތުންގެ ދީނީ ހޭލުންތެރިކަން އިތުރުކުރުވުމާއި، އިސްލާމީ ވަޙްދަތު ދެމެހެއްޓުމަށް ކުރެވޭ މަސައްކަތުގެ ތެރެއިން ކަމަށެވެ. 

މިހާރުވެސް ދައުލަތުގެ މީޑިއާ ޕީއެސްއެމްގެ ދަށުން، 3 ރޭޑިއޯ ޗެނަލާއި، 6 ޓީވީ ޗެނަލް އޮތް އިރު، މުންނާރުގެ ނަމުގައި ދީނީކަންކަމަށް ޚާއްޞަ ޗެނަލެއް ޕީއެސްއެމްއިން އައީ ހިންގަމުންނެވެ. މީގެ އިތުރުން އިސްލާމިކް ސްޓޫޑިއޯގެ ނަމުގައި މިނިސްޓްރީ އޮފް އިސްލާމިކް އެފެއާޒުން އެމިނިސްޓްރީގައިވެސް ސްޓޫޑިއޯއެއް އަންނަނީ ހިންގަމުންނެވެ. އެނގިފައިވާ ގޮޮތުގައި އައު ޓީވީޗެނަލް ހެދުމަށް މަސައްކަތް ކުރަމުން ދަނީވެސް އިސްލާމިކް މިނިސްޓްރީންނެވެ.

ދައުލަތުގެ މީޑިއާއަށް ކުރަންޖެހޭ ހޭދަތައް ބޮޑުވެފައިވާތީ، އެކަމުގެ ފާޑުކިޔުންތައް އަމާޒުވެފައި ވަނިކޮށް، ދައުލަތުގެ މީޑިއާއާއި ވަކިން އަނެއްކާވެސް ސަރުކާރުން ޓީވީޗެނަލެއް ހަދާނަމަ އެކަމަކީ، ފައިސާ އާއި ވަސީލަތް އިސްރާފުވުންކަމުގައި، އިދިކޮޅު މަޖިލިސް މެމްބަރުން ވިދާޅުވެފައި ވެއެވެ.