އިންޑިއާގެ ދެމަނަވަރެއް ރާއްޖޭގެ ސަރަހައްދަށް ވަދެ މަސްދޯނިތަކަށް އެރި މައްސަލައިގައި ސަރުކާރުން ވާހަކަ ނުދައްކާތީ، ނުރުހުންފާޅުކުރައްވައި، ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެމްބަރު މުޙައްމަދު ނަޝީދު، ޢަބުދުﷲ ސަރުކާރަށް ފާޑު ވިދާޅުވެއްޖެއެވެ.

މިއަދު މެންދުރުފަހު އޮތް ރައްޔިތުންގެ މަޖިލީހުގެ ޖަލްސާގައި ވާހަކަފުޅު ދައްކަވަމުން މެމްބަރު ނަޝީދު ވިދާޅުވީ، ރައްޔިތުން އެކަމާއި ގުޅޭ މައުލޫމާތު ބޭނުންވާ ކަމަށާއި، ސަރުކާރު މިހާރަށްވުރެ ޒިންމާދާރުވާން ޖެހޭ ކަމަށެވެ. އަދި އެއީ ކިހިނެއް ހިނގައިގެން އުޅޭ ކަމެއްކަން ސަރުކާރުން މިހާތަނަށްވެސް ސާފުކޮށް ނުދޭތީ އެކަމުގެ ކަންބޮޑުވުން މެމްބަރު ނަޝީދު ފާޅުކުރެއްވިއެވެ.

ޕާޓީތަކުން ޚާރިޖީ ސިޔާސަތުތައްވެސް ގެންގުޅޭ ގޮތަށް މެމްބަރު ނަޝީދު ވަނީ ފާޑު ވިދާޅުވެފައެވެ. މިގޮތުން ޗައިނާ އާއި ދެކޮޅަށް އެއްޗެއް ބުނަން މިސަރުކާރަށް ނުކެރޭ ކަމުގައި އޭނާ ފާހަގަކުރެއްވިއެވެ. މެމްބަރު ނަޝީދު ވިދާޅުވީ، އިންޑިއާ ސިފައިން ދޯނިތަކަށް އެރި މައްސަލައިގައި، ރާއްޖޭގައި ހުންނަވާ އިންޑިއާ ސަފީރު، ޚާރިޖިއްޔާއަށް ހާޟިރުކޮށް އެކަމާއި ގުޅޭ ގޮތުން ސުވާލުކުރަން ޖެހޭ ކަމަށެވެ.

އިންޑިއާގެ އަސްކަރީ ސިފައިން ރާއްޖޭގެ ސަރަހައްދަށް ވަދެ މަސްދޯނިތަކަށް އަރައި ބަލައި ފާސްކުރި ސަބަބެއް ސާފުކޮށްދޭން ޚާރިޖިއްްޔާއި އިންޑިއާ ސަރުކާރުގައި އެދިފައި ވީނަމަވެސް އެކަމާއި ގުޅިގެން އިތުރު މައުލޫމާތެއް ސަރުކާރުން ހާމައެއް ނުކުރެއެވެ.