Advertisement
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޤާމާއި ހަވާލުވެ ވަޑައިގެން ރައްޔިތުންގެ މަޖިލީހާއި މުޚާޠަބުކުރެއްވުން -- ފޮޓޯ:
ރައްޔިތުންގެ މަޖިލިސް މިއަހަރަށް ހުޅުވުމާއި، ރިޔާސީ ބަޔާން އިއްވުން މާދަމާ
މިއަހަރަށް ރައްޔިތުންގެ މަޖިލިސް ހުޅުވުމާއި، ރައީސުލްޖުމްހޫރިއްޔާ ރިޔާސީ ބަޔާން އިއްވެވު މާދަމާ އޮންނާނެއެވެ.
މިއަހަރަށް ރައްޔިތުންގެ މަޖިލިސް ހުޅުވާ ޖަލްސާގައި މައިގަނޑު ކަމަކަށް އޮންނާނީ ރިޔާސީ ބަޔާން އިއްވެވުމެވެ. ރައީސުލްޖުމްހޫރިއްޔާގެ އޮފީހުން ވިދާޅުވީ، މާދަމާ ބާއްވާ ރައްޔިތުންގެ މަޖިލީހަށް ރިޔާސީ ބަޔާން އިއްވެވުމަށްޓަކައި ރައީސުލްޖުމްހޫރިއްޔާ ވަޑައިގަންނަވާނެ ކަމަށެވެ.
ރިޔާސީ ބަޔާނަކީ، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 84 ވަނަ މާއްދާގައިވާ ގޮތުގެމަތިން، ކޮންމެ އަހަރަކު ރައްޔިތުންގެ މަޖިލިސް ހުޅުވާ ޖަލްސާގައި ޤައުމުގެ ޙާލަތާއި އަދި ކުރިޔަށް ހުރި ޕްލޭންތަކާއި ތަޞައްވަރުގެ މައްޗަށް ރައީސުލްޖުމްހޫރިއްޔާ ހުށައަޅުއްވަންޖެހޭ ބަޔާނެކެވެ.
މީގެ ކުރީގެ އަހަރުތަކުގައި ރިޔާސީ ބަޔާން އިއްވާ ޖަލްސާ ދަރުބާރުގޭގައި ބާއްވާފައި ވީނަމަވެސް، މިއަހަރަށް ރައްޔިތުންގެ މަޖިލިސް ހުޅުވުމުގެ ގޮތުން ބާއްވާ ޖަލްސާ އޮންނާނީ ރައްޔިތުންގެ މަޖިލިސް ކުރާ ގޭގައި ކަމަށް މަޖިލީހުގެ އިދާރާއިން ވަނީ ވިދާޅުވެފައެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ވެރިކަމުގެ ދައުރުގައި، ރައްޔިތުންގެ މަޖިލިސް ހުޅުވާ ދުވަހަކީ، ރަސްމީ ބަންދު ދުވަހެއް ކަމުގައި ހަމަޖައްސަވާފައި އޮތް ނަމަވެސް، މިސަރުކާރުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައި ވަނީ، ރައްޔިތުންގެ މަޖިލިސް ހުޅުވާ ދުވަސް ރަސްމީ ބަންދު ނުކުރެއްވުމަށެވެ.
