ނަލަހިޔާ ހޮޓަލުގެ ފުރަތަމަ ފަންގިފިލާގައި މިރޭ އަލިފާނުގެ ހާދިސާއެއް ހިނގައިފިއެވެ.

މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ހާމަކޮށްފައިވާ ގޮތުގައި މި ހާދިސާ ހިނގުމަށް މެދުވެރިވީ، އެ ހޮޓަލުގެ ފުރަތަމަ ފަންގިފިލާގައި ރައްކާކޮށްފައި ހުރި ކަރުދާސް ފޮށިތަކެއްގައި ރޯވުމުގެ ސަބަބުންނެވެ.

މި ހާދިސާގެ ރިޕޯޓު ލިބިގެން އެމްއެންޑީއެފުން ހަރަކާތްތެރިވާން ފެށީ މިއަދުގެ އިރުއޮއްސި 6:22 ގައެވެ. އެމްއެންޑީއެފުން ހާދިސާ ހިނގަމުންދިޔަ ސަރަހައްދަށް ދިޔައިރު، އިމާރާތުގެ ތެރެއިން ބޯކޮށް ދުން އަރަމުންދިޔަކަމަށާއި، މި ހާދިސާ ހިނގާފައިވަނީ ނަލަހިޔާ ހޮޓެލުގެ ފުރަތަމަ ފަންގިފިލާގައި ހިންގަމުންދިޔަ ސައުނާއެއްގައި ކަމަށްވެސް އެ މުއައްސަސާއިން ހާމަކޮށްފައިވެއެވެ.

އަލިފާން ހިފާފައި ހުރި ފޮށިތަކުގައި މާގަދައަށް އަލިފާން ހިފާފައި ނެތުމުން، މާ ގިނަ އިރުތަކެއް ނުވެ އަލިފާންގަނޑު ނިއްވާލެވިއްޖެކަމަށް އެމްއެންޑީއެފުން ބުނެއެވެ. އަދި މި ހާދިސާގައި އެއްވެސް މީހަކަށް ގެއްލުމެއް ލިބިފައެއް ވެސް ނުވެއެވެ.  

އެ ހާދިސާގައި އެއްވެސް މީހަކަށް އަނިޔާއެއް ވެފައިވާނަމަ އެކަން ލަސްނުކޮށް ސިފައިންނާ ހިއްސާކޮށްދިނުމަށް އެ މުއައްސަސާއިން ވަނީ އެދިފައެވެ.