މިނިވަން އިންސާފުވެރި އިންތިޚާބަކަށް މަގުފަހި ކުރުމަކީ އެންމެންގެ ވާޖިބެއް ކުރީގެ ރައީސް އަދިި ރައްޔިތުންގެ މަޖިލީހުގެ ރައީސް މުޙައްމަދު ނަޝިދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވީ، ޖުމްހޫރީ ޕާޓީން އެޕާޓީގެ ރިޔާސީ ޓިކެްޓް ޤާސިމް އިބްރާހިމްށް ރޭ ހަވާލުކުރުމާއި ގުޅިގެން މަރުޚަބާ ވިދާޅުވެ ކުރެއްވި ޓްވީޓުގައެވެ.

އެމްޑީޕީގެ ރިޔާސީ ޕްރައިމަރީ ރައީސް ނަޝީދަށް ނާކާމިޔާބުވެވަޑައިގެންނެވުމާއ ގުޅިގެން އެމަނިކުފާނު ވަނީ، ޕާޓީގެ ތެރޭގައި ވަކި ފެކްޝަނެއް ހައްދަވައި ރިޔާސީ އިންތިޚާބަށް ނުކުންނެވުމަށް މަސައްކަތްޕުޅު ކުރައްވާފައެވެ. އެކަމުގައި ޤާސިމް އިބްރާހީމްގެ ތާއީދާއި މަދަދު ހޯއްދެވުމަށްވެސް ރައީސް ނަޝީދު މަސައްކަތްޕުޅު ކުރެއްވިއެވެ. އެހެން ނަމަވެސް ރައީސް ނަޝީދުގެ ހުށައެޅުއްވުންތައް ޤާސިމް އިބްރާހީމް ޤަބޫލުފުޅު ނުކުރެއްވުމުން، ރައީސް ނަޝީދުގެ އަރިސް ބޭފުޅުން މިހާރު ގެންދަވަނީ، އައު ސިޔާސީ ޕާޓީއެއް ހެއްދެވުމަށް މަސައްކަތްޕުޅު ކުރައްވަމުންނެވެ. މިގޮތުން، އަލަށް އުފައްދާ "ދަ ޑިމޮކްރެޓްސް" ޕާޓީއަކީ މިއަހަރުގެ ރިޔާސީ އިންތިޚާބުގައި ރައީސް ނަޝީދު ވާދަކުރެއްވުމަށް ފުރުޞަތު ހޯއްދަވައި ދެއްވުމުގެ ގޮތުން އުފައްދާ ޕާޓީއެއްކަމަށް ވަރަށް ބޮޑަށް ވަނީ ބެލެވިފައެވެ.

ރައީސް ނަޝީދު ޤާސިމް އިބްރާހީމަށް މަރުޚަބާ ވިދާޅުވި އިރު، ރޭ ބޭއްވި ޖުމްހޫރީ ޕާޓީގެ ޖަލްސާ ދިޔައީ ވަރަށް ވަނދުކޮށެވެ. ޖަލްސާއަށް މީހުން ހާޟިރު ނުވެގެން ދޮޅުގަޑި އިރަށްވުރެ ގިނަ އިރު ޖަލްސާ ނުފަށައިވެސް އޮތެވެ. އަދި ވަރަށް މަދު މީސްކޮޅަކާއި އެކު ޖަލްސާ ކުރިޔަށް ގެންދިޔައިރު، ޖަލްސާއިން ފެނިގެން ދިޔައީ ޤާސިމް އިބްރާހީމަށް ރިޔާސީ އިންތިޚާބު ކާމިޔާބު ނުވާނެ މަންޒަރުކަމަށް ސިޔާސީ ދާއިރާގެ ތަޖުރިބާކާރުން ވަނީ ވިދާޅުވެފައެވެ.