ޗިލީގެ މެދުތެރެއަށްވާ ގޮތަށް، ޖަންގަލީގައި ރޯވެ އަނދަމުންދާ ނުރައްކާތެރި އަލިފާންގަނޑު ކޮންޓްރޯލް ކުރުމުގެ މަސައްކަތް ކުރަމުންދާ މި ދަނޑިވަޅުގައި، އެ ގައުމުގައި ކުއްލި ނުރައްކަލުގެ ހާލަތު އިއުލާންކޮށްފިއެވެ. އެ ގައުމުގައި ކުއްލި ނުރައްކަލުގެ ހާލަތު އިއްލާންކޮށްފައިވަނީ މިއަދުއެވެ. މި ހާދިސާގައި މިހާތަނަށް 10 މީހަކު މަރުވެފައިވާކަމަށް ރިޕޯޓުތައް ބުނެއެވެ.

މި ހާލަތާ ގުޅިގެން ޗިލީގެ ރައީސް ގެބްރިއަލް ބޮރިޗް، "އެކްސް" ގައި ކުރެއްވި ޕޯސްޓެއްގައި ވިދާޅުވެފައިވާ ގޮތުގައި، އަލިފާންގަނޑު ކޮންޓްރޯލް ކުރުމުގެ މަސައްކަތުގައި އެ ގައުމުގެ ދިފާއީ ހުރިހާ ބާރުތަކެއް އަންނަނީ ހަރަކާތްތެރިވަމުންނެވެ.

ހުކުރު ދުވަހު ރޯވެ ފެތުރެންފެށި މި އަލިފާންގަނޑުގައި މިހާތަނަށް އެތައް ހާސް ހެކްޓަރެއް އަނދާފައިވާއިރު، އައްސޭރި ފަށުގައި ހިމެނޭ ސިޓީތައް ކަމުގައިވާ ވިނާ ޑެލް މާ ސިޓީ އާއި ވަލްޕަރައިސޯ ސިޓީގައި ދިރިއުޅެމުންދާ މީހުން މިހާރު ވަނީ އެހެން ދުރު ހިސާބުތަކަށް ބަދަލުވާންޖެހިފައެވެ.  

Advertisement

މި އަލިފާންގަނޑު ހަލުވިކަމާއެކު ފެތުރުމަށް އެންމެ ބޮޑަށް އެހީވަނީ ގަދަ ވަޔެވެ. ވަލްޕަރައިސޯ ސިޓީގެ ނޭޝަނަލް ފޮރެސްޓްރީ ކޯޕަރޭޝަނުގެ އޮފިޝަލަކު ހާމަކޮށްފައިވާ ގޮތުގައި އެ ސިޓީގައި ގަޑިއަކު 25-31 މޭލާއި ދެމެދުގެ ބާރު މިނެއްގައި ވައި ޖެހެމުން ދެއެވެ.

ދުނިޔެ ހޫނުވަމުންދާ މިންވަރަކަށް ނުރައްކާތެރި މޫސުމީ ކާރިސާތައް ކުރިމަތިވާނެ މިންވަރު އިތުރުވާނެކަމަށް ސައިންސްވެރިން ބުނެފައިވާއިރު، މި ހާދިސާގެ ނުރައްކާ އިތުރަށް ގޯސްވެފައިވަނީ، ހޫނު މޫސުމުގެ "ހީޓް ވޭވް" އާއި ދެކުނު އެމެރިކާ ސަރަހައްދަށް ކުރިމަތިވެފައިވާ "އެލް ނީނޯ" ނަމަކަށް ކިޔާ މޫސުމީ ހާދިސާގެ ސަބަބުންނެވެ.

މި ހާދިސާގައި މިހާތަނަށް ޗިލީގެ ވެރިކަންކުރާ ސިޓީގެ ހުޅަނގު ދެކުނުގައި ހިމެނޭ އެސްޓްރެއްލާ އަދި ނެވިދާދް ކިޔާ ސަރަހައްދެއްގެ 30 ގެ އަނދާފައިވެއެވެ. އަދި ވަލްޕަރައިސޯ ސިޓީގައި އެކަނިވެސް 7 ހާސް ހެކްޓަރަށް ވުރެން ބޮޑު ސަރަހައްދެއް އަނދާފައިވެއެވެ.