ދިވެހިރާއްޖޭގެ ޚާއްޞަ އިޤުތިޞާދީ ސަރަހައްދުގައި މަސްވެރިކަން ކުރަމުން ދިޔަ ދިވެހި މަސްދޯނިތަކަކަށް، ކަމާގުޅޭ އެއްވެސް އިދާރާއަކާއި ކޯޑިނޭޓް ކުރުމެއް ނެތި، ބައިނަލްއަޤުވާމީ ކަނޑުގެ ޤާނޫނުތަކާއި އުސޫލުތަކާއި ޚިލާފަށް އިންޑިއާ އަސްކަރިއްޔާގެ ސިފައިން އަރައި، ހިންގި އޮޕަރޭޝަނުގެ ތަފްސީލް ދިނުމަށް ދިވެހި ޚާރިޖިއްޔާ މެދުވެރިކޮށް އިންޑިއާ ސަރުކާރުގައި ރަސްމީކޮށް އެދިފައިވާ ކަމުގައި ޑިފެންސް މިނިސްޓްރީން ބުނެފިއެވެ.

ޑިފެންސް މިިނިސްޓްރީން މިރޭ ނެރުނު ބަޔާނުގައި ބުނީ، ރާއްޖޭގެ ޚާއްސަ ޢިޤުތިޞާދީ ސަރަހައްދުގައި މަސްވެރިކަން ކުރަމުންދިޔަ، ދިވެހި މަސްދޯނިތަކަށް އަރާފައި ވަނީ އިންޑިއާ ކޯސްޓްގާޑުގެ ޝިޕް 246 އާއި، އިންޑިއާ ކޯސްޓްގާޑުގެ ޝިޕް 253ގައި ތިބި ސިފައިން ކަމަށެވެ. މިގޮތުން ތިން ދޯންޏަކަށް އިންޑިއާ ސިފައިން އަރާފައިވާ ކަމަށާއި އެއީ، އަސުރުމާ -3، މާހޯރަ 3 އަދި ނިރު 7 ކަމަށާއި އެދޯނިތަކަށް އިންޑިއާ ސިފައިން އެރީ، ރާއްޖޭގެ ސަރަހައްދުގައި، ހއ. ދިއްދޫގެ އިރު އުތުރުން 72 ނޯޓިކަލް މޭލު ބޭރުގައި ވަނިކޮށް ކަމަށްވެސް ޑިފެންސް މިނިސްޓްރީން ވަނީ ބުނެފައެވެ.

ޑިފެންސް މިނިސްޓްރީން ވަނީ، ރާއްޖޭގެ ޚާއްޞަ އިޤުތިޞާދީ ސަރަޙައްދުގައި މަސްވެރިކަން ކުރުމުގައި ސާބިތުކަމާއި އެކު ދެމިތިބުމަށް މަސްވެރިންގެ ކިބައިން އެދިފައެވެ. އަދި ރާއްޖޭގެ ކަނޑުގެ ސަރަހައްދު ހިމާޔަތްކޮށް ރައްކާތެރިކުރުމުގެ މަސައްކަތުގައި ދިވެހި އަސްކަރިއްޔާއިން ދެމި އޮންނާނެ ކަމުގައިވެސް ޑިފެންސް މިނިސްޓްރީން ވަނީ ބުނެފައެވެ.

ރާއްޖޭގެ ސަރަހައްދުގައި ރާއްޖޭގެ ތިން މަސްދޯންޏަކަށް، އިންޑިއާ ސިފައިން އެރިކަމަށް ރިޕޯޓްކުރުމާއި ގުޅިގެން، ކޯސްޓްގާޑު ޝިޕް ޝަހީދު އަލީ އެސަރަހައްދަށް ދިޔައިރު، މަސްދޯނިތަކަށް އެރުމަށްފަހު އިންޑިއާގެ ކޯސްޓްގާޑުގެ ދެ މަނަވަރު ވަނީ ރާއްޖޭގެ ސަރަހައްދުން ނުކުމެގެން ގޮސްފައި ކަމުގައި މައުލޫމާތު ލިބިފައިވެއެވެ.