ޕްރޮސެކިއުޓަރ ޖެނެރަލް ޙުސައިން ޝަމީމަށް ހަމަލާދިން މައްސަލައިގައި ބަޔަކު ހައްޔަރުކޮށްފިއެވެ.

ފުލުހުންގެ އެކްޓިން ހެޑް އޮފް ކްރައިމް އިންވެސްޓިގޭޝަން ކޮމާންޑް، ޗީފް ސުޕްރިންޓެންޑެންޓް އަހުމަދު ނާފިޒު ވިދާޅުވީ، އެމައްސަލައިގައި ބަޔަކު މިހާރު ހައްޔަރުކޮށްފައިވާ ކަމަށާއި އެހެން ނަމަވެސް މައްސަލައިގެ ތަޙްޤީޤުގެ ވަރަށް ކުރީކޮޅު ކަމުން އޭގެ ތަފްސީލްތައް ހާމަކުރެވެން ނެތްކަމަށެވެ. އެހެންނަމަވެސް މިހާތަނަށް އެ ހަމަލާ އާއި ގުޅިގެން 2 މީހަކު ހައްޔަރުކޮށްފައިވާ ކަމުގައި އޭނާ ވިދާޅުވިއެވެ.

ނާފިޒް ވިދާޅުވީ، ދެމީހަކު ހައްޔަރު ކުރެވުނު ނަމަވެސް އެކަމުގައި އިތުރު ބަޔަކު ބައިވެރިވެފައި ވެދާނެ ކަމަށް ބެލެވޭ ކަމަށެވެ.

ނޫސްވެރިންގެ މިބައްދަލުވުމުގައި، ކޮމިޝަނަރ އޮފް ޕޮލިސް  ޢަލީ ޝުޖާޢު ވިދާޅުވީ، ޕީޖީ ޝަމީމަށް ޙަމަލާ ދީފައި ވަނީ، މޫނު ނިވާކޮށްގެން ތިބި ބައެއް ކަމަށެވެ. އެމީހުން ހައްޔަރުކުރެވިފައި ވަނީ ގްރޭޓަރ މާލެ ސަރަހައްދުންކަމަށާއި ހައްޔަރުކުރެވުނު މީހުންގެ ވަނަވަރު ވަރަށް އަވަހަށް ހާމަކުރައްވާނެ ކަމުގައިވެސް ސީޕީ ވިދާޅުވިއެވެ. ސީޕީ ޝުޖާއު ވިދާޅުވީ، އެފަދަ ހަމަލާއެއް ބަޔަކު ދީފާނެ ކަމުގެ އިންޓަލިޖެންސް މައުލޫމާތެއް ކުރިން ފުލުހުންނަށް ލިބިފައި ނުވާކަމަށެވެ.

ޕީޖީ ޙުސައިން ޝަމީމަށް ޙަމަލާދީފައި ވަނީ އިއްޔެ ހެނދުނު މާލޭ ނޫރު މިސްކިތް ކައިރިން، ސައިކަލެއްގައި އައި ދެމީހެކެވެ. އެދެމީހުންގެ ހަމަލާ ހުއްޓުވީވެސް ޕީޖީ ޝަމީމެވެ. އެހާދިސާގައި ޕީޖީ ޝަމީމްގެ ވާތްޕުޅަށް އަނިޔާވެ އަތުގެ ކަށިގަނޑުގައި ރެނދުލާފައިވެއެވެ.