ގއ. ވިލިގިނލިން އިތުރު ދެމީހަކަށް ހޯއްގޮވާ ކެއްސުން ޖެހި އެބަލި ޖެހުނު މީހުންގެ އަދަދު 5އަށް މަތިިިވެއްޖެއެވެ.

ރާއްޖޭގައި ކޮންޓްރޯލްކޮށްފައިވާ ބައްްޔެއް ކަމުގައިވާ،  ޕަރޓޫސިސް ނުވަތަ ހޯއްގޮވާ ކެއްސުން ޖެހިފައިވާ މީހަކު އެންމެ ފުރަތަމަ ވިލިގިނލިން ފެނިފައި ވަނީ މިހުސްވި ޖެނުއަރީމަހުގެ 23 ވަނަ ދުވަހުގައެވެ. އެދުވަހުން ފެށިގެން އެޗްޕީއޭއިން ގެންދަނީ ގއ. އަތޮޅު ހޮސްޕިޓަލާއި ގުޅިގެން އެބަލި ފެތުރުން ކޮންޓްރޯލް ކުރުމަށް. ޓާސްކްފޯހެއް އެކުލަވާލައިގެން މަސައްކަތްތައް ކުރަމުންނެވެ. މިގޮތުން ބައްޔަ މީހުން ޓެސްޓް ކުރުމާއި، އެއްތާވީ މީހުން ހޯދުމާއި، ވެކްސިން ދިނުމާއި ބައްޔަށް އާއްމުން ހޭލުންތެރި ކުރުވުމުގެ މަސައްކަތް ހިމެނެއެވެ.

އެޗްޕީއޭއިން ވިދާޅުވީ، ވިލިގިނލިން މިހާތަނަށް 5 މީހުން ޕޮޒިޓިވްވެފައި ވާއިރު، އެމީހުންނާއި އެއްތާވީ މީހުންގެ އަދަދު 177އަށް އަރާ ކަމަށެވެ. އަދި އޭގެ ތެރެއިން 25 މީހެއްގެ ކިބައިގައި ބަލީގެ ޢަލާމާތްތައް ފެންނަން ހުރިކަމަށްވެސް އެޗްޕީއޭއިން ވިދާޅުވެއެވެ.

އެޗްޕީއޭއިން ވިދާޅުވީ، ބައްޔަށް ޕޮޒިޓިވްވެފައިވާ 5 މީހުންގެ ތެރެއިން 2 މީހުންނަކީ، ބަލީގެ ނުރައްކާ ބޮޑު ދެމީހުންކަމަށެވެ. 

ގއ. ވިލިގިނލީގައި ބަލިކޮންޓްރޯލް ކުރުމަށް ކުރަމުންދާ މަސައްކަތްތަކުގެ ދަށުން މިހާތަނަށް، ބަލީގެ އަލާމަތްތައް ހުރެގެން 46 މީހަކު ބައްޔަށް ޓެސްޓްކޮށްފައިވާ ކަމަށާއި، 27 މީހަކަށް ޕްރޮފައިލެކްސިސް ދެވިފައިވާ ކަމުގައިވެސް އެޗްޕީއޭއިން ވިދާޅުވިއެވެ.

ޕަރޓޫސިސް އަދި އެހެނިހެން އަރިދަފުސް ރޯގާތަކުން ރައްކާތެރިވުމަށް:

- މާސްކް އަޅައިގެން އުޅުން، ޚާއްސަކޮށް އަލާމާތެއް ހުރިނަމަ މާސްކް އެޅުން އަދި އަލާމާތެއް ހުރިނަމަ ސްކޫލަށް/އޮފީހަށް/މީހުން ގިނަ ތަންތަނަށް ނުދިއުން އަދި ބަލި މީހުން ގާތަށް ނުދިއުން.

- އިންފްލުއެންޒާ އަދި ކޮވިޑް-19 ވެކްސިން ޖެހުން.

- 7 އަހަރުން ދަށުގެ ކުދިންގެ ތެރެއިން ޕަރޓޫސިސްގެ ވެކްސިން ފަރިހަމަ ނުކުރާ ކުދިންގެ ވެކްސިން ފުރިހަމަ ކުރުން

- އަތް ދޮވުން ނުވަތަ ސެނިޓައިޒަރ ބޭނުން ކުރުން.

ހޯއްގޮވާ ކެއްސުމަކީ، ޖަރާސީމެއްގެ ޒަރީއާއިން ފެތުރޭ ބައްޔެކެވެ. އާއްމު ގޮތެއްގައި މިބަލި ޖެހެނީ ކުޑަކުދިންނަށެވެ.