ބާކައުންސިލްގެ ރައީސް އިސްމާޢީލް ވިޝާމް ކުއްލި ގޮތަކަށް އަވަހާރަވެއްޖެއެވެ.

ބާކައުންސިލްގެ ރައީސް ކަމުގެ މަޤާމަށް 11 ޖޫން 2022 ގައި އިންތިޚާބުވެ ވަޑައިގެންނެވި، ޤާނޫނީ ވަކީލް ވިޝާމް އަވަހާރަވީ މިރޭގެ ވަގުތެއްގައި އޭނާ ދިރިއުޅުއްވާ ގެކޮޅުގައެވެ.

ވިޝާމް އަވަހާރަވިކަން ޤާނޫނީ ބައެއް ވަކީލުން ވަނީ މީޑިއާގައި ހާމަކުރައްވާފައެވެ. ބައެއް މީޑިއާތަކުން ރިޕޯޓްކޮށްފައިވާ ގޮތުގައި، ވިޝާމް ފާޚާނާއަށް ވެއްޓިވަޑައިގެންފައި ވަނިކޮށް ފެނިގެން ހޮސްޕިޓަލަށް ގެންދެވުނު އިރު ވަނީ އަވަހާރަވެފައެވެ.

ވިޝާމްއަކީ، ރާއްޖޭގެ ޤާނޫނީ ދާއިރާގައި ފާހަގަކޮށްލެވޭ ވަކީލެކެވެ. ބޮޑެތި މައްސަލަތަކުގައި އޭނާ ކޯޓުތަކުގައި ވަކާލާތު ކުރައްވާފައި ވާއިރު، އެސިސްޓެންޓް އެޓަރނީ ޖެނެރަލްގެ މަޤާމުވެސް ފުރުއްވާފައިވާ ބޭފުޅެކެވެ.