ރައްޔިތުންގެ މަޖިލީހުން ރުހުން ނުދިން ވަޒީރުން އަލުން ހަމަ އެ ވުޒާރާތަކަށް އައްޔަނުކުރުމަކީ ޤާނޫނު އަސާސީގެ ބާރު ކަނޑުވާލުންކަމުގައި، ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު އަދު ޖުޑީޝަލް ސަރވިސް ކޮމިޝަންގެ ރައީސާ ޙިސާން ޙުސައިން ހުސައިން ވިދާޅުވެއްޖެއެވެ.

ޙިސާން މިހެން ވިދާޅުވީ، އެމްޑީޕީގެ ޕާލަމެންޓްރީ ގުރޫޕުން ބޭއްވި ނޫސްވެރިންގެ ބައްދަލުވުމުގައި ދެއްކެވި ވާހަކަފުޅުގައެވެ. ޙިސާން ވިދާޅުވީ ދައުލަތުގެ ތިންބާރުން އެއްވެސް ބާރަކީ، ތަންމިނަށް (އެއްވެސް ހައްދެއްނެތި) ބާރު ލިބިފައިވާ ބާރެއް ނޫންކަމަށެވެ. އަދި ކޮންމެ ބާރަކަށް، ދައުލަތުގެ ނިޒާމްގެ ތެރޭގައި ހިމެނޭ ކޮންމެ މުއައްސަސާއަކަށް ބާރުތަކާއި އިޚްތިޔާރުތައް ދެވިފައި ވަނީ އިންތަކެއް ކަނޑައެޅިގެން ކަމުގައިވެސް ޙިސާން ވިދާޅުވިއެވެ.

ޙިސާން ވިދާޅުވީ، ޤާނޫނު އަސާސީ ބައްޓަންކޮށްފައި އޮތީ އަދި ދައުލަތުގެ ނިޒާމްތައް ބައްޓަންވެފައި އޮންނަނީ، އެއްބާރުން އަނެއްބާރަށް ފާރަވެރިވާ ގޮތަށް، ޗެކްއެންޑް ބެލެންސްގެ ނިޒާމްތަކެއް ރާވައި، އެއްބާރު އަނެއްބާރުގެ މައްޗަށް ފާރަވެރިވުން ލާޒިމްވާ ގޮތަށެވެ. 

ޙިސާން ވިދާޅުވީ، ޤާނޫނީ ވެރިކަމެއް ނެގެހެއްޓުމުގައި، ކަންކަން މާނަކުރަން ޖެހޭނީ، ޤާނޫނު އަސާސިގެ ރޫޙާއި، ޤާނޫނު އަސާސީގެ ތަރަހައިގެ ތެރެއިން ކަމުގައި ޙިސާން ވިދާޅުވިއެވެ.  
ޙިސާން ވިދާޅުވީ، ރައްޔިތުންގެ މަޖިލީހަކީ، ރައްޔިތުންގެ ބާރު ތަމްސީލްކުރާ ދައުލަތުގެ އެއް ބާރު ކަމަށެވެ. އަދި ރައީސުލްޖުމްހޫރިއްޔާ ޢައްޔަނުކުރާ ވަޒީރުންނަށް މަޖިލީހުގެ ރުހުން ހޯދުމަކީ، ޤާނޫނު އަސާސީން ރައީސުލްޖުމްހޫރިއްޔާއަށް ލާޒިމް ކުރާ ކަމެއް ކަމަށާއި، އެއީ އިޚްތިޔާރަށް ދޫކޮށްލާފައި އޮންނަ ކަމެއް ނޫންކަމުގައިވެސް ޙިސާން ވަނީ ވިދާޅުވެފައެވެ.

ހޯމަ ދުވަހު ބޭއްވި ރައްޔިތުންގެ މަޖިލީުގެ ޖަލްސާގައި ރުހުން ނުދިން ތިން ވަޒީރަކު، ހަމަ އެދުވަހު ރައީސުލްޖުމްހޫރިއްޔާ ވަނީ، ކުރިން އެބޭފުޅުން ތިއްބެވ ވުޒާރާތަކަށް އަލުން ޢައްޔަނުކުރައްވައި، މަޤާމުގެ ފަތްކޮޅު ދެއްވާފައެވެ. މަޖިލީހުން ރުހުން ނުދިން ބޭފުޅުން އަލުން މަޤާމުތަކަށް ޢައްޔަނުނުކުރެވޭނެ ކަމަށް، ޤާނޫނު އަސާސީގައި ބަޔާންކޮށްފައި ނެތުމަކީ އެކަން އެގޮތަށް ރައީސުލްޖުމްހޫރިއްޔާ ކުރައްވައިގެން ވާނެ ކަމެއް ނޫންކަމުގައި، ސިޔާސީ ބޭފުޅުންނާއި ޤާނޫނީ ދާއިރާގެ ބޭފުޅުން ގެންދަވަނީ ވިދާޅުވަމުންނެވެ.