ބްރެޒިލްގެ ކުރީގެ ތަރި، އަދި ސްޕެއިންގެ ބާސެލޯނާ އާއި ވެލެންސިއާއަށް ވެސް ކުޅުނު ހުނަރުވެރި ކުޅުންތެރިޔާ، ރޮމާރިއޯގެ 58 ވަނަ އުފަންދުވަހުގެ ޕާޓީގައި ނަގާފައިވާ ސައުދީގެ އަލްހިލާލަށް މިހާރު ކުޅެމުންދާ ނޭމާ ޖޫނިއާގެ ވީޑިއޯތަކެއް ސޯޝަލް މީޑިއާގައި ވައިރަލްވެ، އާންމުންގެ ގިނަ ފާޑު ކިއުންތަކެއް އަމާޒުވުމުން، އެކަމަށް އޭނާ ހޫނު ރައްދެއް ދީފިއެވެ. 

ނޭމާގެ ވީޑިއޯތައް ސޯޝަލް މީޑިއާގައި ވައިރަލްވެފައިވަނީ، މިދިޔަ އަހަރުގެ އޮކްޓޯބަރ 18ގައި އުރުގުއޭ އާއި ބްރެޒިލް ބައްދަލުކުރި މެޗުގައި އޭނާގެ ކަކުލަށް ލިބުނު އަނިޔާއަކާއި ގުޅިގެން ކުޅުމާ ދުރުގައި ހުންނަންޖެހިފައިވާ މި މުއްދަތުގައި، ސިއްހަތަށް ނުބަލައި އުޅޭތީ އޭނާގެ ފިޓްނަސް ގެއްލި، މިހާރު އޭނާ ވަރަށް ބޮޑަށް ފަލަވެފައިވާކަމަށް ބުނެއެވެ. 

ނަމަވެސް މިކަމަށް ރައްދު ދިނުމުގެ ގޮތުން ޖިމްގައި ހުރެ އިންސްޓަގްރާމުގައި ނޭމާ ޕޯސްޓްކުރި ވީޑިއޯއެއްގައި އޭނާގެ ފިޓްނަސް ލެވެލް އަންގައި ދިނުމަށް ބަނޑު ދައްކާލަމުން ބުނީ، އޭނާއަށް ނަފްރަތުކޮށް، އެފަދަ ވާހަކަތައް ފަތުރާ ފަރާތްތަކަށް އެ ވީޑިއޯއިން ހަގީގަތް ހާމަވާނެކަމަށެވެ. ވީޑިއޯއިން ފެންނަ ގޮތުން އޭނާގެ ބަނޑުގައި ފުރިހަމަކޮށް “ގޮޅި”ތައް އެނގެން ނެތަސް، ފިޓްނަސް ގެއްލޭނެފަދަ މިންވަރަކަށް ޝަރުބީ ޖަހާފައި ނުވާކަން ފާހަގަކުރެވެއެވެ. 

އާންމު ގޮތެއްގައި އަނިޔާ ވިޔަސް ކުޅިވަރު ކުޅުންތެރިންނަކީ ފިޓްކޮށް ތިބުމަށް ވަރަށް އިސްކަންދޭ ބައެކެވެ. އެއީ އަނިޔާއިން ރަގަޅުވުމަށްފަހު އަނބުރާ ކުޅެން ނިކުމެ، އަވަހަށް މެޗު ފިޓްނަސްއަށް ވާސިލް ވެވެނީ ކުޅުމުން ދުރުގައި ހުންނަ ދުވަސްތަކުގައި މި ކަންކަމަށް ފަރުވާތެރިވި މިންވަރަކުން ކަމަށްވާތީއެވެ.

ފިޓްނަސްއަށް ސަމާލުކަން ނުދޭކަމުގެ ވާހަކައަކީ ވަރަށް ގިނަ ފަހަރަށް ބްރެޒިލްގެ ކުޅުންތެރިންނަށް އަމާޒުކޮށް މީގެކުރިން ވެސް ދެކެވޭ ވާހަކައެކެވެ. އެގޮތުން ރޮނާލްޑޯ އާއި ރޮނާލްޑީނިއޯ ވެސް މި ލިސްޓުގައި ހިމެނެއެވެ.

ފްރާންސް ޗެމްޕިއަން ޕީއެސްޖީއިން، ސައުދީ އަރަބިއްޔާގެ އަލް ހިލާލަށް ނޭމާ ބަދަލުވީ މިދިޔަ އަހަރުގެ ހޫނު މޫސުމުގައެވެ. ނަމަވެސް އެ ކްލަބުގައި އޭނާއަށް ކުޅެވުނީ 5 މެޗެވެ. އޭގެ ފަހުން އަނިޔާވެ، މި ސީޒަނުގައި އެއްކޮށް ކުޅުމާއި ދުރުގައި މަޑުކުރަން ޖެހޭނެކަމަށް ބްރެޒިލްގެ ގައުމީ ޓީމުގެ ޑޮކްޓަރު ވަނީ ބުނެފައެވެ. އަނިޔާއިން ރަގަޅު ވިޔަސް އޭނާ ދެން އަނބުރާ ހިލާލްގެ ޖާޒީގައި ނުފެންނާނެކަމަށް ބައެއް މީޑިއާތަކުގައި ރިޕޯޓުކޮށްފައި ވެއެވެ. ނަމަވެސް އޭނާގެ ކޮންޓްރެކްޓް ހަމަވާނީ 2025 ގައެވެ.