އިޒްރޭލާ ފަލަސްޠީނުގެ މައްސަލަ ހައްލުކުރުމުގައި ރާއްޖެއިން ޤަބޫލުކުރާގޮތް ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު،  އެމެރިކާގެ ސްޓޭޓް ޑިޕާރޓްމަންޓްގެ އެސިސްޓަންޓް ސެކްރެޓަރީ އޮފް ސްޓޭޓް ފޮރ ސައުތު އެންޑް ސެންޓްރަލް އޭޝިއަން ‌‏އެފެއާޒް ޑޮނާލްޑް ލޫއާ ހިއްސާކުރައްވައިފިއެވެ.

ޑޮނާލްޑް ލޫއާ ރައީސުޖުމްހޫރިއްޔާގެ އަރިހަށް ކުރެއްވި ޒިޔާރަތުގައި، ފަލަޞްތީނާއި އިޒްރޭލުގެ މައްސަލައަށް އަލިއަޅުއްވާލައްވައި، ރައީސް ޑރ. މުޙައްމަދު މުޢިއްޒު ވަނީ ދެދައުލަތުގެ ހައްލަކީ، ރާއްޖެއިން ޤަބޫލު ކުރާ ގޮތް ކަމުގައި ފާހަގަކުރައްވާފައެވެ. މިގޮތުން އެމަނިކުފާނު ވިދާޅުވީ، އެ މައްސަލައަށް ދާއިމީ ޙައްލެއް ހޯދެން އޮތީ ބައިނަލްއަޤްވާމީ ގޮތުން ގަބޫލުކުރާ ދެދައުލަތެއް ޤާއިމުކޮށް، 1967 ވަނަ އަހަރުގެ ކުރިން އޮތް ބޯޑަރުތަކުގެ މައްޗަށް ބިނާކޮށް އިރުމަތީ ޤުދުސްއަކީ ފަލަސްޠީނުގެ ވެރިރަށުގެ ގޮތުގައި ކަނޑައަޅައި، އަދި ފަލަސްޠީނަކީ ސިޔާދަތީ އަދި މިނިވަން ދައުލަތެއްގެ ގޮތުގައި ކަނޑައެޅިގެން ކަމަށެވެ. އަދި ކުރިއަށް އޮތީ ރަމަޟާން މަހަށްވާތީ، ފަލަސްޠީނުގެ ޣައްޒާ ރައްޔިތުންނާ ދެކޮޅަށް އިސްރާއީލުން ހިންގާ އުދުވާންތައް ދާއިމީ ގޮތެއްގައި ހުއްޓާލުމަށް އުންމީދު ކުރައްވާކަމުގައިވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ.

އެމެރިކާގެ ސްޓޭޓް ޑިޕާރޓްމަންޓްގެ އެސިސްޓަންޓް ސެކްރެޓަރީ އޮފް ސްޓޭޓް ފޮރ ސައުތު އެންޑް ސެންޓްރަލް އޭޝިއަން ‌‏އެފެއާޒް ޑޮނާލްޑް ލޫއާ މިވާހަކަފުޅުތައް ރައީސް ޑރ. މުއިއްޒު ދެއްކެވި އިރު އެމެރިކާއަކީ، ޣައްޒާގެ ކުށެއް ނެތް އާއްމުން މެރުމަށް އިޒްރޭލަށް ހަތިޔާރުދީ، އަދި ޣައްޒާ ހަނގުރާމައިގައި ސިފައިންވެސް ބައިވެރިކޮށްފައިވާ ޤައުމެކެވެ.