ދިވެހިންގެ މެދުގައި، އެންމެ އާއްމު ބޭސް ޕެނަޑޯލް ބޭނުން ކުރުން ރާއްޖޭގައި ވަގުތީ ގޮތުން މަނާކޮށްފިއެވެ.

އެބޭސް ބޭނުން ކުރުމާއި ވިއްކުން މޯލްޑިވްސް ފުޑް އެންޑް ޑްރަގު އޮތޯރިޓީ (އެމްއެފްޑީއޭ)އިން މަނާކުރީ، އެބޭހުގެ ފެންވަރާއި ރައްކާތެރިކަމާއި މެދު ސުވާލުތައް އުފެދިގެންނެވެ. ޕެނަޑޯލް ބޭނުންކުރުން ވަގުތީ ގޮތުން މަނާކޮށް، އެ އޮތޯރިޓީން ނެރުނު ބަޔާނުގައި ބުނީ، މާކެޓުން ނަގައި ޓެސްޓްުކުރި ބައެއް ބޭސްގުޅަތަކުން މައްސަލަތައް ފެނިފައިވާ ކަމަށެވެ. މިގޮތުން ބޭސްގުޅަތަކުން ތަންތަން ކޮޅު ނެއްޓިފައި ހުރުމާއި ފުނޑުފުނޑުވެފައި ހުރުން ފާހަގަކުރެވޭ ކަމަށާއި، އާއްމު ގޮތެއްގައި އެގޮތަށް ދިމާވަނީ ބޭސް އުފެއްދުމާއި ރައްކާކޮށް ބެލެހެއްޓުމުގައި ފުރިހަމަ ކުރަންޖެހޭ މިންގަނޑުތަކާއި އެއްގޮތަށް ޢަމަލު ނުކުރުމުން ކަމަށެވެ.

އެމްއެފްޑީއޭއިން ވަނީ، އެބޭހާއި މެދު ވަކި ގޮތެއް އަންގަންދެން. އާއްމު ފިހާރަތަކާއި ބޭސް ފިހާރަތަކުގައި މިހާރު ހުރި ޕެނަޑޯލް ނަގައި، އެ ބޭހުގެ ސްޓޮކް ބޭސް ރައްކާކުރުމަށް ކަނޑައަޅާފައިވާ ފިނި ހޫނު މިނުގައި އެތަކެތި ބެހެއްޓުމަށް އެދިފައެވެ. މަނާކުރި ޕެނަޑޯލް އަކީ، ސްރީލަންކާގައި އުފައްދާ ބޭހެކެވެ.