ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒުގެ ސަރުކާރުގައި ހިމެނޭ، 3 ވަޒީރަކަށް ރުހުން ނުދީ، ވަޒީރުންގެ މަޖިލީހުން ބޭރުކޮށްލައިފިއެވެ.

މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި، ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ވަޒީރުންގެ މަޖިލީހުގައި ހިމެނިވަޑައިގަންނަވާ މެމްބަރުންގެ ތެރޭގައި، މަޖިލީހުން ރުހުން ނުދިނީ، ބަންޑާރަ ނައިބު އަޙްމަދު އުޝާމަށާއި، މިނިސްޓަރ އޮފް އިސްލާމިކް އެފެއާޒް ޑރ. މުޙައްމަދު ޝަހީމް ޢަލީ ސަޢީދަށާއި، މިނިސްޓަރ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް ޑރ. ޢަލީ ހައިދަރަށެވެ.

މިތިން ބޭފުޅުންނަކީ، އެމްޑީޕީއާ ދަ ޑިމޮކްރެޓްސްއިންވެސް ރުހުން ނުދޭން ނިންމި ތިންބޭފުޅުންނެވެ. އިކޮނޮމިކް މިނިސްޓަރ މުޙައްމަދު ސަޢީދަށް ރުހުން ނުދިނުމަށް ދަ ޑިމޮކްރެޓްސްއަކުން ނުނިންމައެވެ. މިނިސްޓަރ ސަޢީދު ސަލާމަތްވެވަޑައިގެންނެވީ އެންމެ ވޯޓެއްގެ ތަފާތުންނެވެ. ސަޢީދަށް ރުހުންދޭން ނުފެންނަ ކަމަށް 30 މެމްބަރުން ވޯޓު ދެއްވި އިރު 31 މެމްބަރުން ވޯޓު ދެއްވީ ރުހުންދޭން ފެންނަކަމަށެވެ.

ވަޒީރުންގެ މަޖިލީހުގެ މެމްބަރުންނަށް ރުހުން ދިނުމުގެ މައްސަލައިގައި މިއަދު ޖަލްސާ ބޭއްވުނީ ތަފާތު އެކިފަހަރުމަތިން އެޖަލްސާ ބޭއްވުމަށް މަޖިލީހުގެ ރިޔާސަތުން މަސައްކަތް ކުރެއްވުމަށްފަހުގައެވެ. ޖަލްސާ ނިންމަާލައްވަމުން މަޖިލީހުގެ ރައީސް މުޙައްމަދު އަސްލަމް ވަނީ ރުހުން ލިބިވަޑައިގެންނެވި ވަޒީރުންނަށް މަރްޙަބާ ވިދާޅުވެފައެވެ.