މިސަރުކާރުގެ ވަޒީރުންނަށް ރުހުން ދިނުމަށް ބާއްވާ ރައްޔިތުންގެ މަޖިލީހުގެ ޖަލްސާ، 13:00ގައި ފެށުމަށް ތާވަލުކޮށްފިއެވެ.

އިއްޔެއިންފެށިގެން ވަޒީރުންނަށް ރުހުން ދިނުމުގެ މައްސަލަ ކުރިޔަށް ގެންދިޔުމަށް ރިޔާސަތު މަސައްކަތްކުރި ނަމަވެސް، ސަރުކާރަށް ތާއީދު ކުރާ މެމްބަރުން ހުރަސްއަޅުއްވަމުން ގެންދިޔުމާއި ގުޅިގެން، އެޖަލްސާ ވަނީ ކުރިޔަށް ގެންދެވޭ ގޮތް ނުވެފައެވެ. 

ވަޒީރުންނަށް ރުހުން ދިނުމުގެ މައްސަލައިގައި މިއަދު 11:00 ގައިވެސް ޖަލްސާ ބޭއްވުމަށް ތާވަލު ކުރިއެވެ. އެހެން ނަމަވެސް އެޖަލްސާވެސް ބޭއްވޭގޮތް ވަނީ ނުވެފައެވެ.

ސަރުކާރަށް ތާއީދު ކުރައްވާ މެމްބަރުން މަޖިލީހުގެ ޖަލްސާއަށް ހުރަސްއަޅުއްވަމުން ގެންދަވަނީ، ސަރުކާރުންގެ ބައެއް ވަޒީރުންނަށް ރުހުން ނުދިނުމަށް އިދިކޮޅު މައި ދެޕާޓީން ނިންމުމާއި ގުޅިގެންނެވެ. ރައްޔިތުންގެ މަޖިލީހުގެ މެޖޯރިޓީއޮތީ އިދިކޮޅު ޕާޓީތަކަށެވެ. އެހެންކަމުން ސަރުކާރުން ބޭނުންވާ ގޮތަށް މަޖިލީހުގެ ތެރެއިން ކަންކަން ކުރުމަށް ސަރުކާރަށް ފުރުޞަތެއް ނެތެވެ.