މިސަރުކާރުގެ ވަޒީރުނަށް ރުހުން ދިނުމަށް ބާއްވާ ރައްޔިތުންގެ މަޖިލީހުގެ ޖަލްސާ މާދަމާާ 11 ޖަހާއިރު ބޭއްވުމަށް އަނެއްކާވެސް ތާވަލުކޮށްފިއެވެ. 

މިއަދު ބޭއްވި ރައްޔިތުންގެ މަޖިލީހުުގެ ޖަލްސާގައިވެސް ވަޒީރުންނަށް ރުހުން ދިނުމުގެ މައްސަލަ ކުރިޔަށް ގެންދިޔުމަށް މަސައްކަތް ކުރި ނަމަވެސް 1:30ގައި ވޯޓަށް އަހަން ތައްޔާރުވުމާއި އެކު މަޖިލީހުގައި ތިއްބެވި ސަރުކާރަށް ތާއީދު ކުރާ މެމްބަރުން ވަނީ މަޖިލީހުގެ ޖަލްސާ ކުރިޔަށް ގެންދިޔުމަށް ހުރަސް އަޅާފައެވެ. މަޖިލީހުގެ ޖަލްސާ މިރޭވެސް ކުރިޔަށް ގެންދިޔުމަށް މަޖިލީހުގެ ރައީސް މުޙައްމަދު އަސްލަމް މަސައްކަތް ކުރެއްވި ނަމަވެސް ސަރުކާރަށް ތާއީދު ކުރާ މެމްބަރުން ހުރަސް އަޅުއްވަމުން ގެންދިޔުމާއި ގުޅިގެން ޖަލްސާ ބޭއްވޭ ގޮތް ވަނީ ނުވެފައެވެ.

އެހެންވެ މަޖިލީހުގެ ޖަލްސާ ނިންމަވާލެއްވިކަން ރިޔާސަތުން ޢިއުލާނުކުރެއްވީ މިރޭގެ 10:57 ގައެވެ.ރައްޔިތުންގެ މަޖިލީހުގެ ޖަލްސާއެއް މާދަމާ ބޭއްވުމަށް ތާވަލުކުރި އިރު އެޖެންޑާގައި ހިމަނާފައި ވަނީވެސް މެމްބަރުންނަށް ރުހުން ދިނުމުގެ މައްސަލައެވެ.

މަޖިލީހުގެ މިއަދުގެ ޖަލްސާ ހޫނުވެ މެމްބަރުންގެ މެދުގައި މާރާމާރީވެސް ހިނގާފައި ވާއިރު، ޖަލްސާ ހޫނުވާން މެދުވެރިވީ، މަޖިލީހުގެ މެޖޯރިޓީ އޮތް އިދިކޮޅު ފަރާތްތަކުން މިސަރުކާރުގެ ބައެއް ވަޒީރުންނަށް ރުހުން ނުދޭނެކަން ހާމަކުރުމާއި ގުޅިގެންނެވެ. މިސަރުކާރުގެ ބައެއް ވަޒީރުންނަށް ރުހުން ނުދޭނެކަމުގެ އަޑު ގަދަވެފައި ވީނަމަވެސް، އެމްޑީޕީއާ ދަ ޑިމޮކްރެޓްސްއިންވެސް ވަކި ވަޒީރުންތަކަކަށް ރުހުން ނުދޭނެކަން ރަސްމީކޮށް މިހާތަނަށް ހާމަކޮށްފައެއް ނުވެއެވެ. އެނގިފައިވާ ގޮތުގައި، އިދިކޮޅުން ރުހުން ނުދޭނެ ވަޒީރުންގެ މަޖިލީހުގެ މެމްބަރުންގެ ތެރޭގައި، ބަންޑާރަ ނައިބު ޢަޙްމަދު އުޝާމް އާއި، ހައުސިންގ މިނިސްޓަރ ޑރ. ޢަލީ ހައިދަރާއި، އިސްލާމިކް މިނިސްޓަރ ޑރ. މުޙައްމަދު ޝަހީމް އަލީ ސަޢީދާއި، އިކޮނޮމިކް މިނިސްޓަރ މުޙައްމަދު ސަޢީދުގެ އިތުރުން ޓުއަރިޒަމް މިނިސްޓަރ އިބްރާހީމް ފައިޞަލް ހިމެނިވަޑައިގަންނަވައެވެ.