ސާރޗު އެންޑް ރެސްކިއުގަޔާއި، ބަލިމީހުން އުފުލުމުގެ ޚިދުމަތް ޝަރުޠުކޮށް ރާއްޖޭގައި އަމިއްލަ ފަރާތަކަށް ހެލިކޮޕްޓަރު އުދުއްސުމުގެ ޚިދުމަތް ދިނުމަށް، ވަޒީރުންގެ މަޖިލީހުގެ ލަފާފުޅާއި އެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ. އެމަނިކުފާނު މި ނިންމެވުން ނިންމެވީ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންއިން ހުށަހެޅި ކަރުދާހަށް ވަޒީރުންގެ މަޖިލީހުގައި މަޝްވަރާ ކުރެއްވުމަށް ފަހުގައެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާގެ އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، ޢަބްދުﷲ ނާޡިމް އިބްރާހީމް ވިދާޅުވީ، އަމިއްލަ ފަރާތަކަށް ދީގެން ރާއްޖޭގައި ހެލިކޮޕްޓަރުގެ ޚިދުމަތް އަލުން ފެށުމުގައި މައިގަނޑު 6 ކަމެއް ކުރުމަށް ވަޒީރުންގެ މަޖިލީހުން މިއަދު ނިންމަވާފައިވާ ކަމަށެވެ.

އޭގެ ތެރޭގައި ހިމެނެނީ، ސަރޗް އެންޑް ރެސްކިއު އާއި ބަލިމީހުން އުފުލުމުގެ ޚިދުމަތް ދިނުން ލާޒިމްކޮށް، ދެ އިންޖީނުލީ ހެލިކޮޕްޓަރު ބޭނުންކޮށްގެން ހެލިކޮޕްޓަރުގެ އޮޕަރޭޝަން ފެށުމަށް ކުރަންޖެހޭ ކަންކަން ކުރުމާއި، އެ ޚިދުމަތް ނޫން އެހެން ޚިދުމަތްތައް ދޭންވާނީ ހުއްދަ ދީފައިވާ ހެލިޕޯޓަކުންކަން ކަނޑައެޅުން ހިމެނެއެވެ.

މީގެ އިތުރުން ވާދަވެރި ބީލަމެއްގެ ތެރެއިން ނުވަތަ ރެސްޓްރިކްޓެޑް ޓެންޑަރއެއްގެ ތެެރެއިން ހެލިކޮޕްޓަރު އުދުއްސުމުގެ ޚިދުމަތް ފޯރުކޮށްދޭނެ ބަޔަކު ހޯދައި، އަދި އެފަދަ ފަރާތްތަކަށް 5 އަހަރާއި 7 އަހަރު ދުވަހުގެ އެކްސްކްލޫސިވިޓީއެއް ދިނުމަށްވެސް ނިންމަވާފައިވާ ކަމުގައި ނާޒިމް ވިދާޅުވިއެވެ. އަދި މިބަދަލުތަކާއި އެކު، މިހާރު މަޖިލީހަށް ހުށައަޅާފައި އޮތް ވައިގެ ދަތުރުފަތުރާއި ބެހޭ ބިލަށް ބަދަލު ގެނެސް އަލުން މަޖިލީހަށް ހުށައެޅުމާއި، ވެލާނާ އެއާޕޯޓުގައި ހެލިޕޯޓަކަށް ޖާގަ ހެދުމާއި، އިތުރުތަނެއްގައި ހެލިޕޯޓެއް ހަދަންޖެހޭކަމަށް ފާހަގަކުރެވޭނަމަ އެކަމަށް ކުރަންޖެހޭ ކަންތައްތައް ކުރުމަށްވެސް މިއަދުގެ ވަޒީރުންގެ މަޖިލީހުގައި މަޝްވަރާކޮށް ވަނީ ނިންމަވާފައެވެ.

ރާއްޖޭގައި 1990 ގެ އަހަރުތަކުގެ ކުރީކޮޅު "ހަމިން ބާޑު"ގެ ނަމުގައި ހެލިކޮޕްޓަރުގެ ޚިދުމަތް ދިނެވެ. އޭރު އެޚިދުމަތް ދިން އިރުވެސް އަތޮޅުތަކުން މާލެއަށް ބަލި މީހުން ގެނައުމަށް ހެލިކޮޕްޓަރު ބޭނުން ކުރިއެވެ. އެހެން ނަމަވެސް އެޚިދުމަތް ހުއްޓާލީ، ރާއްޖޭގައި ގާތްގާތުގައި ހެލިކޮޕްޓަރު ވެއްޓުމުގެ 2 ހާދިސާއެއް ހިނގައި 14 މީހުންގެ ފުރާނަ ގެއްލިގެން ދިޔުމަށް ފަހުގައެވެ.