ވަޒީރުންގެ މަޖީލީހުގެ ބައެއް މެމްބަރުންނަށް ރުހުން ނުދޭން އެމްޑީޕީއާ ދަ ޑިމޮކްރެޓްސް އިން ނިންމާފައިވާތީ، ސަރުކާރަށް ތާއީދު ކުރާ މަޖިލީހުގެ މެމްބަރު އަދިވެސް ތިބީ މަޖިލީހުގެ ޖަލްސާ ކުރިޔަށް ގެންދިޔަ ނުދީ ހުރަސްއަޅައިގެން ކަމުގައި މަޖިލީހުގެ ބައެއް މެމްބަރުން ވިދާޅުވެއްޖެއެވެ.

މަޖިލީހުގެ ޖަލްސާ މިރޭވެސް ކުރިޔަށް ގެންދެވޭތޯ މަޖިލީހުގެ ރިޔާސަތުން މަސައްކަތް ކުރެއްވިއެވެ. މިގޮތުން މިރޭގެ 20:00އަށް ޖަލްސާއަލުން ތާވަލުކޮށް ޖަލްސާ ފަށަން މަސައްކަތް ކުރި ނަމަވެސް ސަރުކާރު ކޯލިޝަނަށް ތާއީދު ކުރާ މަޖިލިސް މެމްބަރުން ވަނީ ރިޔާސަތަށް ހުރަސްއަޅުއްވާފައެވެ.

މަޖިލީހުގެ ޖަލްސާ މިއަދު ކުރިޔަށް ނުގެންދެވުނީ، ސަރުކާރަށް ތާއީދުކުރާ މެމްބަރުން، އިދިކޮޅު ޕާޓީތަކުގެ މެމްބަރުން މަޖިލީހުގެ ޗެމްބަރަށް ވަނަ ނުދިނުމަށްޓަކައި ދޮރުތައް ތަޅުގައިގެން ހިފެހެއްޓެވުމުންނެވެ. މިރޭގެ ޖަލްސާފެށުމާއި އެކު އެމްޑީޕީ ދޫކުރައްވައި، ޕީއެންސީއާ ގުޅިވަޑައިގެންނެވި މެމްބަރުން ވަނީ، މަޖިލީހުގެ ރިޔާސަތަށް ހުރަސް އަޅުއްވައި، ޖަލްސާ ހުއްޓުވާފައެވެ. މިގޮތުން މަޖިލީހުގެ ޖަލްސާ ހުއްޓުވުމަށްޓަކައި ރިޔާސަތުގައި ބަހައްޓާފައިވާ މައިކްރޯފޯން ނަގައިގެން ދިޔައީ ކޮމަންޑޫ ދާއިރާގެ މެމްބަރު މުޙައްމަދު ރާޝިދެވެ.

ރައްޔިތުންގެ މަޖިލީހުގެ މެމްބަރުން އަދިވެސް ތިއްބެވީ ހެނދުނުއްސުރެ މަޖިލިސް ކުރާ ގޭގައެވެ. ޖަލްސާ އާއި ގުޅޭ ގޮތުން އިތުރު އެއްޗެއް ރިޔާސަތުން އަދި ނާންގަވާތީ އެބޭފުޅުން މަޖިލީހުގެ އިދާރާގައި ތިއްބެވީ ކަމުގައިވެސް އެމެމްބަރުން ވިދާޅުވިއެވެ.

ވަޒީރުންގެ ތެރެއިން، ރުހުން ނުދިނުމަށް ނިންމާފައިވާ ބޭފުޅުންގެ ތެރޭގައި، ބަންޑާރަ ނައިބު އަހުމަދު އުޝާމް އާއި ހައުސިން މިނިސްޓަރު ޑރ. އަލީ ހައިދަރާއި، ނިސްޓަރު ޑރ. މުހައްމަދު ޝަހީމް އަލީ ސައީދާއި، އިކޮނޮމިކް މިނިސްޓަރ މުޙައްމަދު ސަޢީދާއި، ޓޫރިޒަމް މިނިސްޓަރ އިބްރާހީމް ފައިޞަލް ހިމެނިވަޑައިގަންނަވާކަމަށް މަޢުލޫމާތު ލިބިފައިވެއެވެ.