ހުޅުމާލެ ފޭސް 2ގެ ނިރޮޅުމަގުގައި ނުރައްކާތެރި އެކްސިޑެންޓެއް ހިނގައި ޒުވާނަކު ވަރަށް ބޮޑަށް ޒަޚަމްވެއްޖެއެވެ.

ފުލުހުންގެ އިދާރާއިން ވިދާޅުވީ، މި އެކްސިޑެންޓް ހިނގާފައި ވަނީ، ބުރާސްފަތި ދުވަހުގެ މެންދުރު 11:15 ހާއިރުގައި ކަމަށެެވެ. މަންޒަރުދުށް ފަރާތްތަކުން މައުލޫމާތު ދީފައިވާ ގޮތުގައި އެކްސިޑެންޓް ހިނގަން މެދުވެރިވީ، ބާރު ސްޕީޑުގައި ދުއްވާފައި ދިޔަ ސައިކަލު ކާރެއްގައި ޖެހިގެންނެވެ.

މިހާދިސާގައި ޒަޚަމްވެފައި ވަނީ، އުމުރުން 18 އަހަރުގެ ޒުވާނަކަށެވެ. އަދި އެކްސިޑެންޓާއި ގުޅިގެން އޭނާއަށް އެންމެ ފުރަތަމަ ފަރުވާދީފައި ވަނީ ހުޅުމާލެ ހޮސްޕިޓަލުގައެވެ. އަދި އޭނާގެ ސިކުނޑިއަށް ލޭ އެޅިފައިވާތީ، އޭޑީކޭ ހޮސްޕިޓަލަށް ބަދަލުކޮށް މިހާރު ފަރުވާދެމުން ގެންދާކަމުގައިވެސް ފުލުހުން ވިދާޅުވިއެވެ.