ރައްޔިތުންގެ މަޖިލީހުގައި ހިމެނޭ ސަރުކާރު ކޯލިޝަނަށް ނިސްބަތްވާ 23 މެމްބަރަކު ސޮއެކުރައްވައި ރައްޔިތުންގެ މަޖިލީހުގެ ރައީސާއި ނައިބުރައީސްގެ އިތުބާރުނެތްކަމުގެ މައްސަލަ މަޖިލީހަށް މިއަދު ހުށައަޅައިފިއެވެ.

މަޖިލީހަށް މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ ސަަރުކާރު ކޯލިޝަނަށް ނިސްބަތްވާ މެމްބަރުން ހުށައަޅާފައި މިވަނީ، މިއަދު ދައުރުން ބޭރުގައި ބޭއްވި ރައްޔިތުންގެ މަޖިލީހުގައި ޖަލްސާގައި މަޖިލީހުގައި ވަޒީރުނަށް ރުހުން ދިނުމާއި ގުޅޭ ވޯޓުގެ ކަންކަން ކުރިޔަށް ގެންދިޔަ ނުދީ ހިފެހެއްޓުމަށްފަހުގައެވެ. ވަޒީރުންނަށް ރުހުންދިނުމުގެ މައްސަލައިގެ ވޯޓު ނެގިޔަ ނުދިނުމަށްޓަކައި ރައްޔިތުންގެ މަޖިލީހުގެ ތަޅުމަށް އިދިކޮޅު މެމްބަރުންނަށް ނުވަދެވޭނެހެން، ސަރުކާރު ކޯލިޝަނަށް ނިސްބަތްވާ މެމްބަރުން ވަނީ މަޖިލީހުގެ ދޮރުތަކުގައި ތަޅުލައިގެން ގިނަ އިރުތަކެއް ވަންދެން ހިފަހައްޓަވާފައެވެ. އެކަމާިއ ގުޅިގެން ރައްޔިތުންގެ މަޖިލީގުގެ އިދާރާގެ ތެރޭގައި މެމްބަރުންގެ މެދުގައި ހަމަނުޖެހުންތައްވެސް ހިނގިއެވެ.

މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ މަޖިލީހަށް ހުށައަޅައި، އެޤަރާރުގައި މަޖިލީހުގެ ސަރުކާރަށް ނިސްބަތްވާ މެމްބަރުން ތުހުމަތުކޮށްފައި ވަނީ، މަޖިލީހުގެ ރައީސް މުޙައްމަދު އަސްލަމާއި، މަޖިލީހުގެ ނައިބު ރައީސް އަޙްމަދު ސަލީމް ވަކިޕާޓީއެއްގެ މަސްލަޙަތު ކުރިއަރުވަން އުޅޭ ކަމަށެވެ.

މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ ސަރުކާރު ކޯލިޝަނުން މަޖިލީހަށް ވެއްދި އިރު، މަޖިލީހުގެ ރައީސާއި ނައިބު ރައީސް މަޤާމުން ވަކިކުރެވޭނެ އަޣުލަބިއްޔަތެއް ސަރުކާރު ކޯލިޝަނަކަށް ނެތެވެ. އެމްޑީޕީއާ ޑިމޮކްރެޓްސް އާއެކުގައި މަޖިލީހުގެ ތެރޭގައި މަސައްކަތް ކުރަން ފަށާފައިވާއިރު، އެދެޕާޓީގައި 56 މެމްބަރުން ތިއްބަވައެވެ. ސަރުކާރަށް ތާއީދުކުރާ ތިއްބެވީ 24 މެމްބަރުންނެވެ. އަދި މަޖިލީހުގައި 6 ދާއިރާއެއްގެ ގޮނޑިތައް ހުސްވެފައިވާ އިރު މިދައުރުގައި އެގޮނޑިތަކަށް މެމްބަރުން އިންތިޚާބެއް ނުކުރާނެއެވެ.