ރައީސުލްޖުމްހޫރިއްޔާ، ޑރ. މުހައްމަދު މުޢިއްޒުގެ ސަރުކާރުގެ ބައެއް ވަޒީރުންނަށް ރުހުން ނުދޭނެކަން އެނގިގެން ސަރުކާރަށް ތާއީދުކުރާ މެމްބަރުން މަޖިލީހުގެ ޗެމްބަރ ތަޅުލައިފިއެވެ.

މަޖިލީހުގެ ޖަލްސާ އިންޓަވަލްއަށް މެދު ކަނޑާލުމަށްފަހު، 1:30ގައި ވޯޓަށް އަހަން ހަމަޖައްސާފައި ވަނިކޮށް ވަޒީރުންނަށް ރުހުން ދިނުމުގެ ވޯޓަށް ހުރަސް އެޅުމަށްޓަކައި ޕީޕީއެމް ޕީއެންސީއަށް ނިސްބަތްވާ މަޖިލީހުގެ މެމްބަރުން، މަޖިލީހުގެ ޗެމްބަރަށް ވަދެ އިދިކޮޅު މެމްބަރުންނަށް މަޖިލީހަށް ނުވަދެވޭނެހެން މަޖިލީހުގެ ޗެމްބަރު އެތެރެއިން ވަނީ ތަޅުލާފައެވެ. އަދި މިވަގުތާއި ހަމައަށްވެސް މަޖިލީހުގެ ޖަލްސާ ކުރިޔަށް ގެންދެވޭ ގޮތް ވެފައި ނުވަނީ ޖަލްސާ ކުރިޔަށް ގެންދިޔުމަށް ސަރުކާރަށް ތާއީދު ކުރާ މެމްބަރުން ހުރަސްއަޅަމުން ދިޔުމާއި ގުޅިގެންނެވެ.

މީގެ އިތުރުން ސަރުކާރުގެ ވަޒީފާތަކުގައި ތިއްބެވި ބައެއް ފަރާތްތަކާއި ބައެއް އާއްމުން މަޖިލިސް ކުރާ ގޭދޮށުގައި މިހާރު މުޒާހަރާ ކުރަމުންދާކަމުގައިވެސް މައުލޫމާތު ލިބިފައިވެއެވެ.

ވަޒީރުންގެ ތެރެއިން، ރުހުން ނުދިނުމަށް ނިންމާފައިވާ ބޭފުޅުންގެ ތެރޭގައި، ބަންޑާރަ ނައިބު އަހުމަދު އުޝާމް އާއި ހައުސިން މިނިސްޓަރު ޑރ. އަލީ ހައިދަރާއި، ނިސްޓަރު ޑރ. މުހައްމަދު ޝަހީމް އަލީ ސައީދާއި، އިކޮނޮމިކް މިނިސްޓަރ މުޙައްމަދު ސަޢީދާއި، ޓޫރިޒަމް މިނިސްޓަރ އިބްރާހީމް ފައިޞަލް ހިމެނިވަޑައިގަންނަވާކަމަށް މަޢުލޫމާތު ލިބިފައިވެއެވެ.