ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޒީރުންގެމަޖިލހުގައި ހިމެނިވަޑައިގަންނަވާ ބައެއް ވަޒީރުންނަށް ރުހުން ނުދިނުމަށް އެމްޑީޕީއާ ދަ ޑިމޮކްރެޓްސްއިން ނިންމައިފިއެވެ.

މަޖިލީހުގެ ތެރޭގައި އެމްޑީޕީއަ ދަ ޑިމޮކްރެޓްސްއިން ގުޅިގެން މަސައްކަތްކުރުމަށް ނިންމާފައިވާ ކަމަށް އެދެޕާޓީން މިދިޔަ ހަފްތާގައި ވަނީ ހާމަކޮށްފައެވެ. އަދި މިއަދު ދެޕާޓީގެ ޕާލަމެންޓްރީ ގްރޫޕުން ބައެއް ވަޒީރުންނަށް ރުހުން ނުދިނުމަށް ނިންމާފައިވާކަން ވަނީ އެނގިފައެވެ. އަދި މަޖިލީހުގައި ހިމެނިވަޑައިގަންނަވާ ބައެއް މެމްބަރުންވެސް ވަނީ ބައެއް ވަޒީރުންނަށް ރުހުން ނުދޭނެކަން ސޯޝަލް މީޑިއާގައި ހާމަކުރައްވާފައެވެ.

ވަޒީރުންގެ ތެރެއިން، ރުހުން ނުދިނުމަށް ނިންމާފައިވާ ބޭފުޅުންގެ ތެރޭގައި، ބަންޑާރަ ނައިބު އަހުމަދު އުޝާމް އާއި ހައުސިން މިނިސްޓަރު ޑރ. އަލީ ހައިދަރާއި، ނިސްޓަރު ޑރ. މުހައްމަދު ޝަހީމް އަލީ ސައީދާއި، އިކޮނޮމިކް މިނިސްޓަރ މުޙައްމަދު ސަޢީދާއި، ޓޫރިޒަމް މިނިސްޓަރ އިބްރާހީމް ފައިޞަލް ހިމެނިވަޑައިގަންނަވާކަމަށް މަޢުލޫމާތު ލިބިފައިވެއެވެ.

ރުހުން ނުދޭނެކަމަށް ބެލެވިފައިވާ ވަޒީރުންގެ މަޖިލީހުގައި ހިމެނިވަޑައިގަންނަވާ މެމްބަރުންގެ ތެރެއިން، ބަންޑާރަ ނައިބު އަޙްމަދު ޢުޝާމް އެކްސްގައި ވިދާޅުވީ، އެމަނިކުފާނު ވަޒީފާގެ ހައިސިއްޔަތުން ޕްރޮފެޝަނަލީ ނިންމާފަ އޮތް އެއްވެސް ނިންމުމަކާ ގުޅިގެން ރުހުން ނުދޭން ޖެހޭ އެއްވެސް ސަބަބެއް ނޯންނާނެކަމަށާއި ރުހުން ނުދޭނަމަ އެކަމަކީ ޒާތީކަމެއް ކަމަށެވެ. ޒާތީގޮތުން ޖައްސާލާ، ސަރުކާރު ބަލިކަށިކުރުމުގެ ނިޔަތުގަ ކުރާ މިކަހަލަ ކަންކަމުން ސަރުކާރު ބަލިކަށިވެސް ނުކުރެވޭނެކަމަށާއި ރައީސް ޑރ. މުއިއްޒު ހުންނެވީ ގަދަކޮށް ކަމުގައި އުޝާމް ވިދާޅުވިއެވެ.

ރައްޔިތުންގެ މަޖިލީހުގެ ޖަލްސާގައި ވޯޓަށް އަހާ ގަޑިއަކީ 1:30 ނަމަވެސް މަޖިލީހުގެ ޖަލްސާ އިންޓަވަލް ގަޑިއަށް މެދު ކަނޑާލިގޮތަށް އަދި ނުފަށައެވެ.

މަޖިލީހުން ރުހުން ނުދޭ ވަޒީރުންނަށް ވަޒީރުންގެ މަޖިލީހުގައި ދެމި ނުތިއްބެވޭނެއެވެ.