އިތުބާރު ނެތްކަމުގެ ވޯޓުނަގައި ރައީސް ނަޝީދު މަޤާމުން ވަކިކުރަން ބޭނުންވާ ޢަދަދަށްވުރެ އިތުރަށްވެސް މެމްބަރުން ސޮއިކުރައްވައި ރައްޔިތުންގެ މަޖިލީހަށް މައްސަަލަ ވައްދައިފިއެވެ.

މުޅިމަޖިލީހުގެ އަޣުލަބިއްޔަތަށް ބަލާއިރު ރައީސް ނަޝީދު މަޤާމުން ވަކިކުރަން ބޭނުންވާނީ 44 ވޯޓެވެ. އެހެން ނަމަވެސް އެމްޑީޕީން މިއަދު ރައްޔިތުންގެ މަޖިލީހަށް ރައީސް ނަޝީދުގެ ޢިތުބާރު ނެތްކަމުގެ މައްސަލަ ހުށައަޅާފައި ވަނީ 54 މެމްބަރުންގެ ވޯޓާއި އެކުގައެވެ.

ރައީސް ނަޝީދުގެ ޢިތުބާރު ނެތްކަމުގެ ވޯޓު ނަގައި މަޤާމުން ވަކިކުރުމަށް އެމްޑީޕީން ނިންމާފައި ވަނީ މައިގަނޑު 6 ސަބަބެއްގެ މައްޗަށް ރިޢާޔަތް ކުރައްވައިގެންނެވެ. އޭގެ ތެރޭގައި މަޖިލީހުގެ ޤަވާއިދާއި ޚިލާފަށް ޢަމަލު ކުރައްވަމުން ގެންދިޔުމާއި، ސަބަބެއް ހާމަ ނުކުރައްވައި މަޖިލީހުގެ ރިޔާސަތު ކޮންމެ ދުވަހަކުވެސް ދޫކޮށްލައްވައި ވަޑައިގެންނެވުމާއި، މެމްބަރުންނާއި މެދު ޒާތީވެ ކަންކަން ކުރެއްވުމާއި، ރައްޔިތުންގެ މަޖިލީހުގެ ކޮމިޓީތައް އަލުން އެކުލަވާ ނުލައި މަޖިލީހުގެ ކޮމިޓީތަކުގެ މަސައްކަތްތައް ހުއްޓުވާފައި އޮތުން ހިމެނެއެވެ.

އަދި މަޖިލީހުގެ ރައީސް ކަމުގެ މަޤާމުގައި ރައީސް ނަޝީދު އިތުރަށް ބެހެއްޓެވުމަކީ، ރައްޔިތުންގެ މަޖިލީހުން އަދާކުރަންޖެހޭ ޤާނޫނީ ޒިންމާ އަދާކުރުމުގެ ފުރުޞަތު ގެއްލި، ރައްޔިތުންގެ ކުރިމަތީގައި މަޖިލީހުގެ ޤަދަރު ކުޑަވެގެންދާނެ ކަމެއް ކަމުގައި އެމްޑީޕީގެ ޕާލަމެންޓްރީ ގުރޫޕުން އިސްވެ އޮފެ ރައްޔިތުންގެ މަޖިލީހަށް ހުށައެޅި މައްސަލައިގައި ބުނެފައިވެއެވެ.