މިސަރުކާރުގެ 22 ވަޒީރުންނަށް ރުހުންދިނުމާއި ގުޅޭ މައްސަަލަައިގައި މާދަމާ ވޯޓަށް އެހުމަށް ނިންމައި މަޖިލީހުގެ ޚާއްޞަ ޖަލްސާގެ އެޖެންޑާ އާއްމުކޮށްފިއެވެ.

މާދަމާ ބާއްވާ ރައްޔިތުންގެ މަޖިލީހުގެ ޖަލްސާއަކީ، ދައުރުން ބޭރުގައި ބާއްވާ ރައްޔިތުންގެ މަޖިލީހުގެ ޚާއްޞަ ޖަލްސާއެކެވެ. ދައުރުން ބޭރުގައި ބޭއްވުމަށް ހަމަަޖައްސާފައިވާ މަޖިލީހުގެ ޖަލްސާގައި މާދަމާ ކުރުމަށް ހަމަޖެހިފައިވާ އެންމެ މުހިއްމު ކަންކަމަކީ، މިސަރުކާރުގެ 22 ވަޒީރުންނަށް ރުހުން ދިނުމާއި ގުޅޭ ގޮތުން، ވޯޓަށް އެހުމާއި އިންތިޚާބާއި ބެހޭ ޤާނޫނަށް އިސްލާޙް ގެނައުމަށް ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުޙައްމަދު ޝިފާޢު ހުށައަޅުއްވާފައިވާ ބިލްގެ މަސައްކަތް ކުރިޔަށް ގެންދިޔުމެވެ.

މީގެ އިތުރުން، ދިވެހިރާއްޖޭގެ ބިމާއި ބެހޭ ޤާނޫނަށް އިސްލާޙް ގެނައުމުގެ ބިލާއި، ސަރުކާރުގެ ވުޒާރާތަކުގެ މަސައްކަތުގެ ދާއިރާތައް ރައްޔިތުންގެ މަޖިލީހުން ފާސްކުރުމަށްޓަކައި، އެމައްސަލަ މަޖިލީހުގެ ދާއިމީ ކޮމިޓީއަށް ފޮނުވުން ހިމެނެއެެވެ.

އާއްމު ގޮތެއްގައި މަޖިލީހުގެ ޖަލްސާގައި ނަގާ ވޯޓުތަކުގައި ވޯޓަށް އަހާނީ މެންދުރު ފަހު 1:30ގައެވެ. މާދަމާ ވަޒީރުންނަށް ރުހުން ދިނުމުގެ މައްސަލަ މަޖިލީހުގައި ކުރިޔަށް ގެންދިޔުމަށް އެޖެންޑާގަިއ ހިމަނާފައި ވާއިރު، އެމްޑީޕީއާ ދަ ޑިމޮކްރެޓްސްގެ މެޖޯރިޓީ އޮތް މަޖިލީހުން ބައެއް ވަޒީރުންނަށް ރުހުން ނުދޭނެ ކަމަށް ވަނީ ބެލެވިފައެވެ.

ރައްޔިތުންގެ މަޖިލީހުން ރުހުން ނުދޭ ވަޒީރުން މަޤާމުން ވަކިވާނެއެވެ.