ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިތުބާރު ނެތްކަމުގެ މައްސަލަ މަޖިލީހަށް ހުށައެޅުމަށް އެމްޑީޕީގެ ޕާލަމެންޓްރީ ގުރޫޕުން ނިންމައިފިއެވެ.

ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ހުށައެޅުމަށް ނިންމީ، މަޖިލީހުގެ ޤަވާއިދާއި ޚިލާފަށް އަދި މަޖިލީހުގެ ރިޔާސަތުން އަމަލު ކުރާ ގޮތުގެ ސަބަބުން ކަމުގައި އެމްޑީޕީގެ ޕާލަމެންޓްރީ ގުރޫޕުގެ ލީޑަރ މުހައްމަދު އަސްލަމް ވިދާޅުވިއެވެ. އަސްލަމް މިހެން ވިދާޅުވީ، މިއަދު އެމްޑީޕީގެ ޕާލަމެންޓްރީ ގުރޫޕުން ބޭއްވި ބައްދަލުވުމަށްފަހުގައި ބޭއްވި ނޫސްވެރިންގެ ބައްދަލުވުމުގައެވެ.

އަސްލަމް ވިދާޅުވީ، މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ހުށައެޅުމަށް އެމްޑީޕީ ޕާލަމެންޓްރީ ގުރޫޕުގެ 110 ވަނަ ބައްދަލުވުމުގައި ނިންމެވީ، 36 މެމްބަރުންގެ ވޯޓުން އެކަން ފާސްކޮށްގެން ކަމަށެވެ. އެމްޑީޕީގައި 56 މެމްބަރުން ތިއްބަވާއިރު، މިއަދު ބޭއްވި ޕާލަމެންޓްރީ ގުރޫޕްގެ ބައްދަލުވުމުގައި ނެގި ވޯޓުގައި 42 މެމްބަރުން ބައިވެރިވެ ވަޑައިގެންނެވިއެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަޖިލީހުގެ ރައީސް ކަމުގެ މަޤާމުން ދުރުކުރެވޭވަރަށް އެމްޑީޕީގައި މެމްބަރުން އެބަތިއްބެވެ. މަޖިލީހުގެ ރައީސް ނަޝީދުގެ އިތުބާރު ނެތްކަމުގެ މައްސަލަ ހުށައެޅުމަށް ތައްޔާރުވިއިރު، މަޖިލީހުގެ ނައިބު ރައީސް އީވާ ޢަބުދުﷲ ގެ އިތުބާރު ނެތްކަމުގެ މައްސަލަ 50 މެމްބަރުންގެ ސޮޔާއިއެކު ވަނީ ހުށައަޅާފައެވެ. މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ ފާސްކުރެވޭނީ ހާޟިރުވެ ވޯޓުގައި ބައިވެރިވެވަޑައިގަންނަވާ މެމްބަރުންގެ އަޣުލަބިއްޔަތުންނެވެ. މުޅިމަޖިލީހުގެ އަޣުލަބިއްޔަތަކީ 44 އެވެ.

ޚުދު ރައީސް ނަޝީދަކީވެސް އެމްޑީޕީގެ ޕާލަމެންޓްރީ ގުރޫޕުގެ މެމްބަރަކަށް ވާއިރު، ރިޔާސީ އިންތިޚާބުގެ ޕްރައިމަރީގައި ރައީސް ނަޝީދަށް ލިބިވަޑައިގެންނެވި ނާކާމިޔާބީއަށް ފަހުގައި ރައީސް ނަޝީދު ގެންދަވަނީ އެމްޑީޕީގެ ތެރޭގައި ވަކި ފެކްޝަނެއް ހައްދަވައިގެން މަސައްކަތް ކުރައްވަމުންނެވެ. އަދި ރައީސް ނަޝިދަށް ތާއީދު ކުރެއްވި މެމްބަރުން އެމްޑީޕީން ވަކިވެވަޑައިގެން ދަ ޑިމޮކްރެޓްސްގެ ނަމުގައި، ސިޔާސީ ޕާޓީއެއް އުފެއްދުމުގެ މަސައްކަތް ދަނީ ކުރައްވަމުންނެވެ.