އައިވޮރީ ކޯސްޓްގައި ކުރިޔަށްދާ އެފްރިކަން ކަޕް އޮފް ނޭޝަންސް (އެފްކޮން)ގެ ރައުންޑް-އޮފް-ސިކްސްޓީނުން ޖާގަ ނުލިބި، މުބާރާތާއި އެފްރިކާގެ ވަރުގަދަ ގައުމުތަކެއް ކަޓައިފިއެވެ. 

މުބާރާތުން ކެޓި ވަރުގަދަ ޓީމުތަކުގެ ތެރޭގައި ސަރަހައްދީ ގަދަބާރު، ގާނާއާއި، 2019 ވަނަ އަހަރު މުބާރާތް ކާމިޔާބުކުރި އަލްޖީރިއާގެ އިތުރުން ޓިއުނީޝިއާ ހިމެނެއެވެ. މުބާރާތުގައި ވާދަކުރާ ޓީމުތައް 6 ގްރޫޕަކަށް ބަހައި، ކޮންމެ ގްރޫޕެއްގެ އެއްވަނަ އަދި ދެވަނަ ޓީމުގެ އިތުރުން، ތިން ވަނައަށްދާ ޓީމުތަކުގެ ތެރެއިން އެންމެ ރަގަޅު ނަތީޖާތަކެއް ހޯދާ 4 ޓީމަކަށް ނޮކްއައުޓް ބުރުގެ ފުރުސަތު އޮތް ނަމަވެސް، މި ޓީމުތަކަށް ވަނީ އެ ފުރުސަތުވެސް ގެއްލިފައެވެ.

ގްރޫޕް ސްޓޭޖުގައި އެއްވެސް މެޗަކުން ގާނާ މޮޅުވެފައި ނުވާއިރު، އެ ޓީމުވަނީ ގްރޫޕް-ބީގެ އެއްވަނަ ހޯދި ކޭޕް ވާޑް އަތުން 2-1 އިން ބަލިވެފައެވެ. އަދި އިޖިޕްޓާއި މޮޒަމްބީކް އަތުން އެއްވަރުވެ، ޖުމްލަ ލިބިފައިވަނީ 2 ޕޮއިންޓެވެ. މޮޒަމްބީކް މެޗު އެ ޓީމަށް ކާމިޔާބު ނުކުރެވުނީ، މެޗުގެ އިތުރު ވަގުތުގައި މޮޒަމްބީކުން ކާމިޔާބު ކުރި ގޯލުތަކުންނެވެ. މި ނަތީޖާއާއެކީ އެ ޓީމުގެ ޓެކްނިކަލް ބައެއް ސްޓާފުން ބަދަލުކުރުމަށް، ގާނާ ފުޓުބޯޅަ އެސޯސިއޭޝަނުންވަނީ ނިންމާފައެވެ.

2019 ވަނަ އަހަރު އެފްކޮން ކާމިޔާބުކުރި އަލްޖީރިއާ މުބާރާތުން ވަކިވާންޖެހުނީ، ގްރޫޕް ސްޓޭޖުގެ ފަހު މެޗުގައި މޮރިޓޭނިއާއިން އެ ޓީމު 1-0 އިން ބަލިކުރުމުންނެވެ. މި ނަތީޖާއާއެކީ މޮރިޓޭނިއާއިން ވަނީ މުޅިން އަލަށް މުބާރާތުގެ ނޮކްއައުޓް ބުރުން ޖާގަ ހޯދާފައެވެ. މިއީ އެ ޓީމުން މުބާރާތުގައި ވާދަކުރާ ތިންވަނަ ފަހަރެވެ.

މި ކާމިޔާބާއެކީ މޮރިޓޭނިއާ އިން އެންމެން ހައިރާންކޮށްލިއިރު، މުބާރާތް ބާއްވާ އައިވޮރީ ކޯސްޓާއި އިޖިޕްޓަށް ވެސް ރައުންޑް-އޮފް-ސިކްސްޓީންގެ ޖާގައެއް ކަށަވަރުވީ ހަމަ ކިރިޔާއެވެ.

މުބާރާތުގެ ރައުންޑް-އޮފް-ސިކްސްޓީންގެ މެޗުތައް ކުރިޔަށް ގެންދިއުމަށް ހަމަޖެހިފައިވަނީ ޖެނުއަރީ 27 އިން 30 އަށެވެ. 

ރައުންޑް-އޮފް-ސިކްސްޓީންގެ މެޗުތައް ތާވަލުކުރެވިފައިވާ ގޮތް؛

ޖެނުއަރީ 27

އެންގޯލާ – ނެމީބިއާ

ނައިޖީރިއާ – ކެމަރޫން

28 ޖެނުއަރީ

އިކުޓޯރިއަލް ގިނީ – ގިނީ

އިޖިޕްޓް – ޑީއާރު ކޮންގޯ

29 ޖެނުއަރީ

ކޭޕް ވާޑް – މޮރިޓޭނިއާ

ސެނެގާލް – އައިވޮރީ ކޯސްޓް

30 ޖެނުއަރީ

މާލީ – ބުރުކީނާ ފަސޯ

މޮރޮކޯ – ސައުތު އެފްރިކާ