ރައްޔިތުންގެ މަޖިލީހުގެ އިންތިޚާބު މިއަހަރުގެ ރަމަޟާންމަހުގެ 7 ވަނަ ދުވަހު ބޭއްވުމަށް އިލެކްޝަންސް ކޮމިޝަނުން ނިންމާފައި ވަނިކޮށް، ރަމަޟާން މަހު އިންތިޚާބުތައް ނުބާއްވާގޮތަށް ހަމަޖެއްސުމަށް އިންތިޚާބުތަކާއި ބެހޭ އާއްމު ޤާނޫނަށް، އިހަވަންދޫ ދާއިރާގެ މެމްބަރު މުޙައްމަދު ޝިފާޢު އިސްލާޙެއް ހުށައަޅުއްވައިފިއެވެ.

ޝިފާޢު ވިދާޅުވީ އިންތިޚާބާއި ބެހޭ އާއްމު ޤާނޫނަށް އިސްލާޙް ހުށައެޅުއްވީ، ރަމަޟާންމަހަށް އިންތިހާބު ތާވަލުކުރެވޭތީ ރައްޔިތުންގެ މެދުގައިއޮތް ބޮޑުނުތަނަވަސްކަމާއެކު އިންތިހާބުގައި ރައްޔިތުންގެ ބައިވެރިވުން ކުޑަވެދާނެކަމަށްއޮތް ކަންބޮޑުވުމަށް ހައްލެއްހޯއްދެވުމަށް ކަމަށެވެ.

މިގޮތުން އިންތިޚާބުތަކާއި ބެހޭ އާއްމު ޤާނޫނުގެ 43 ވަނަ މާއްދާގެ (ށ)އަށް ހުށައަޅާފައިވާ އިސްލާޙްގައި ބުނެފައި ވަނީ، ރަމަޟާންމަހުގެ ދުވަހެއްގައި އިންތިޚާބު ބާއްވައިގެން ނުވާނެ ކަމަށާއި، ރަމަޟާން މަހާއި ދިމާވާނަމަ އެ އިންތިޚާބެއް ބާއްވާން ވާނީ ރަމަޟާން މަސް ނިމުމުގެ 10 ދުވަސް ފަހުން ކަމަށެވެ.

މީގެ އިތުރުންވެސް އިންތިޚާބާއި ބެހޭ ޤާނޫނުގެ މާއްދާތަކަށް ގިނަ އިސްލާޙްތަކެއް މެމްބަރު ޝިފާޢު ވަނީ ހުށައަޅުއްވާފައެވެ.

މިއަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބު ރޯދަމަހުގެ ކުރިންވެސް އަދި ފަހުންވެސް ބޭއްވެންއޮތީ، ޤާނޫނު އިސްލާޙްކޮށްގެން ކަމުގައި، އިލެކްޝަންސް ކޮމިޝަންގެ ރައީސް ފުވާދު ތައުފީޤުވެސް ކުރިން ވަނީ ވިދާޅުވެފައެވެ. އަދި މަޖިލީހުގެ ކޮމިޓީއާއެކު ބޭއްވެވި ބައްދަލުކުރެއްވުމުގައި އެކަން ފާހަގަކުރެއްވި ކަމުގައިވެސް ފުވާދު ވަނީ ވިދާޅުވެފައެވެ.

މިހާރު އޮތް ގޮތުން ރައްޔިތުންގެ މަޖިލީހުގެ އިންތިޚާބު ބާއްވާނީ، 17 މާރިޗު 2024ވާ އާދީއްތަ ދުވަހުގައެވެ. އެދުވަސް ދިމާ ވަނީ، ރަމަޟާން މަހުގެ 7 ވަނަ ދުވަހާއެވެ. ކަލަންޑަރުގައިވާ ގޮތުން މިއަހަރުގެ ރަމަޟާން މަސް ފެށޭނީ މާރިޗު މަހުގެ 11 ވަނަ ދުވަހުގައެވެ.