މާލޭ އަމީނީ މަގުގައި ހުރި މައްސަލަތައް ބަލައި ރަނގަޅު ކުރުމަށް ދަނީ މަސައްކަތް ކުރަމުން ކަމުގައި، މިނިސްޓަރ އޮފް ކޮންސްޓަރކްޝަން އެންޑް އިންފްރާސްޓްރަކްޗަރ ޑރ. ޢަބުދުﷲ މުއްޠަލިބު ވިދާޅުވެއްޖެއެވެ.

މިނިސްޓަރ މިހެން ވިދާޅުވީ، އަމީނީ މަގުގައި ތާރު އަޅައިގެން ހަދާފައިވާ ބައިގެ ތާރުނެއްޓި ވަޅުގަނޑުތައް ހެދެމުންދާކަން އާއްމު މީހަކު އެކްސްގައި ކުރި ޕޯސްޓެއްގައި ފާހަގަކުރުމާއި ގުޅިގެން އެކަމަށް ޖަވާބު ދެއްވަމުންނެވެ. މިނިސްޓަރ ވިދާޅުވީ އަމީނީ މަގު އިއްޒުއްދީން މަގާއި ހަމައަށް ތާރުއަޅައިގެން އެމަގު ހަދާފައިވަނީ ކުރީ ސަރުކާރުން ކަމަށެވެ.

މިސަރުކާރުގެ މިވީ ދެމަސްދުވަހުގުެ ތެރޭގައި ހަދާފައި ވަނީ އަމީނީ މަގުގެ ނުހެދި އޮތް ފަހު ދެ ސެގްމެންޓްގެ ބައެެވެ. އެއީ ހައުސިންގ މިނިސްޓްރީއާ ހަމައިން، އެމަގުގެ ހުޅަނގުކޮޅުން ބޮޑު ތަކުރުފާނު މަގާއި ގުޅޭ ހިސާބަށް އޮތް ބައެވެ. މީގެ ހަފްތާއެއް ކުރިން ވަނީ އެބައިގެ މަސައްކަތް ނިންމައި އާއްމު ދަތުރުފަތުރަށް ހުޅުވާލާފައެވެ.

އަމީނީ މަގު ތާރުއަޅައިގެން ޒަމާނީ ފެންވަރަށް ތަރައްޤީކޮށްފައި ވީނަމަވެސް އެމަގުގައި ފެންބޮޑުވާ މައްސަލައަށް ހައްލު ލިބިފައި ނުވާތީ އާއްމުންގެ ފާޑުކިޔުންތައް ވަނީ އަމާޒުވެފައެވެ.

މުޅި އަމީނީ މަގު، 13 ސެގްމެންޓަކަށް ބަހާލައިގެން، ތާރު އަޅައިގެން ޒަމާނީ ފެންވަރަށް ތަރައްޤީކުރުމަށް ސަރުކާރުގެ ބަޖެޓުން ވަނީ 84 މިލިޔަން ރުފިޔާ ޚަރަދުކޮށްފައެވެ.