ހުޅުމާލޭގައި ބިމުއަޑީގައި ވަޅުލާފައިވާ ކަރަންޓް ކޭބަލްތައް ބުރިކޮށް ވަގަށް ނެގުމުގެ މައްސަލަތައް ދިމާވަމުން އަންނަ ކަމުގައި އާބަންކޯއިން ބުނެފިއެވެ. 

އާބަންކޯގެ ޕަބްލިކް ރިލޭޝަންސް މެނޭޖަރު އަހުމަދު މިމްރާޙް މިހެން ވިދާޅުވީ، ހުޅުމާލޭގެ މަގުތައް އަނދިރިކަމުގެ ޝަކުވާކޮށް، އާއްމު މީހަކު ޓްވިޓާގައި ފާޅުކުރި ޝުއޫރާއި ގުޅިގެން، އެކަން ސާފުކޮށްދިނުމުގެ ގޮތުން ކުރެއްވި ޓްވީޓެއްގައެވެ.

މިމްރާޙް ވިދާޅުވީ، ހުޅުމާލޭގެ މަގުތަކުގެ ބައްތިތައް ނުދިއްލުމަށް ދިމާވާ އެންމެ ބޮޑު މައްސަލައަކީ ބންކޮނެގެން ކަރަންޓް ނަރުތައް ވަގަށް ނަގަމުން ދިޔުން ކަމަށެވެ. އަދި އެކަމަށް ހައްލެއް ހޯދުމަށް ފުލުހުންނާއި ގުޅިގެން މަސައްކަތްތަކެއް ކުރަމުންދާކަމުގައިވެސް އޭނާ ވިދާޅުވިއެވެ.   

މިމްރާޙް ވިދާޅުވީ، ރައްޔިތުންނާއި ގުޅުންހުރި މިފަދަ ކަންކަމަށް އަވަސް ހައްލެއް ހޯދައި ދިނުމުގައި އަރބަންކޯގެ ޓީމު ވަރުބަލިކަމެއްނެތި މަސައްކަތް ކުރަމުންދާނެ ކަމުގެ ޔަގީންކަން ރައްޔިތުންނަށް އަރުވާކަމަށެވެ.

ބިންކޮނެގެން ކަރަންޓް ކޭބަލްތައް ބުރިކޮށް ވަގަށް ނެގުމުގެ އިތުރުން، ހުޅުމާލޭގައި އަލަށް އިމާރާތްކުރާ އިމާރާތްތަކުން ކަރަންޓް ކޭބަލްތައް ވަގަށް ނަގާ މައްސަލަތައްވެސް އަންނަނީ ފެންމަތިވަމުންނެވެ.

ބެލެވިފައިވާ ގޮތުގައި ހުޅުމާލޭގައި ބިންކޮނެގެން ކަރަންޓް ނަރުތައް ނަގައި ވިއްކަމުންދާކަމުގެ ތުހުމަތު ކުރެވިފައިވަނީ، މަސްތުވާތަކެތި ބޭނުން ކުރާ ފަރާތްތަކަށެވެ. ހުޅުމާލޭގައި މަސްތުވާތަކެތި ބޭނުން ކުރާ މީހުން، ދަގަނޑުގެ ބާވަތްތަަކާއި ކަރަންޓްނަރު އެއްކޮށްގެން، ހުޅުމާލޭގައި ހުންނަ ބާދަގަނޑު ގަންނަ ތަންތަނަށް އެތަކެތި ވިއްކައެވެ.