ފުރިހަމަ މާނައިގައި ސަރުކާރުން ކައުންސިލްތައް، ބާރުވެރިކޮށް ދެއްވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ މާލެ ސިޓީ ކައުންސިލުގެ 4 ވަނަ ދައުރު (ބައި-އިލެކްޝަން)ގެ މޭޔަރ އަދި ކައުންސިލް މެންބަރުން ހުވައިކުރެއްވުމުގެ ދަރުބާރުގައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާ ވިދާޅުވީ، ފުރިހަމަ މާނައިގައި ސަރުކާރުން ކައުންސިލްތައް، ބާރުވެރިކޮށް ދެއްވާނެކަމަށާއި، މިސަރުކާރުގެ މިދިޔަ ދެމަހެއްހާ ދުވަހުވެސް މަސައްކަތްކުރީ އެ މަގުންކަމަށެވެ. މިގޮތުން ކައުންސިލްތަކަށް އާމްދަނީ ހޯދައިދިނުމަކީ، ސަރުކާރުން އެންމެ އިސްކަންދޭނެ އެއްކަންތައް ކަމުގައި ރައީސުލް ޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، އަތޮޅު ފިހާރަތަކުގެ ފައިސާ އަތޮޅުކައުންސިލްތަކަށް ލިބެން ފެށުންމުން ރަށު ކައުންސިލްތައް މެދުވެރިކޮށް މަސައްކަތްތައް ކުރެވޭނެ ކަމަށެވެ. އަދި މިހާރުވެސް މިހާރުވެސް އަތޮޅު ކައުންސިލްތަކަށް ހަވާލުކުރަން ޖެހިފައި ހުރި، އެހެން ނަމަވެސް، ހަވާލުނުކޮށް ހުރި ފައިސާ އެބަހުރި ކަމަށާއި، ދެ ފުށް ފެންނަ ނިޒާމުގެ ތެރެއިން، އެ އަތޮޅަކަށް ނިސްބަތްވާ، ފައިސާގެ އަދަދުން އެ އަތޮޅަކަށް އެ ރޭޝިއޯއިން ހަވާލުކުރަމުންދާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

އިދާރީ ދާއިރާތައް ލާމަރުކަޒީ އުސޫލުން ހިންގުމުގައި މާލޭ ހުރި އަތޮޅު ފިހާރަތަކުގެ ފައިސާ އަތޮޅު ކައުންސިލްތަކަށް ދިނުމުގެ މަސައްކަތް ފުރަތަމަ ފެށީ އެމްޑީޕީ ސަރުކާރުގައެވެ. މާލޭގައި ކޮންމެ އަތޮޅަކަށް ނިސްބަތްވާގޮތަށް އަތޮޅު ފިހާރަތަކެއް އެޅުއްވީ، މާލެއިން ވޯރާ ވިޔަފާރިވެރިން ފޮނުއްވާލެއްވުމަށްފަހުގައި، ކުރީގެ ރައީސް އިބްރާހީމް ނާޞިރެވެ.