އެފްރިކަން ކަޕް އޮފް ނޭޝަންސްގައި ގްރޫޕް-އޭ އާއި ގްރޫޕް-ބީގެ ފަހު މެޗުތައް ރޭ ކުޅުނުއިރު، އެންމެ ހައިރާންކުރުވަނިވި ގޮތަކަށް "ރައުންޑް އޮފް 16" އަށް ދަތުރުކޮށްފައިވަނީ އިޖިޕްޓެވެ. އަނެއްކޮޅުން މުބާރާތް ބާއްވާ އައިވޮރީ ކޯސްޓް ވަނީ އިކުޓޯރިއަލް ގިނީ އަތުން ތަފާތު ބޮޑުކޮށް ބަލިވެ، އެމީހުންގެ އަމިއްލަ ބާރު ކެނޑި، މުބާރާތާ އަލްވަދާއު ކިޔަންޖެހިދާނެކަމުގެ ބިރު ހީވެފައެވެ.

ގާނާ މެޗުގައި މަސްގަނޑަށް ލިބުނު އަނިޔާއަކާ ގުޅިގެން އިޖިޕްޓުން އެމީހުންގެ ތަރި މުހައްމަދު ސަލާހްއާ ނުލާ ރޭ ގްރޫޕްގެ ފަހު މެޗުގައި ކޭޕް ވާޑްއާ ބައްދަލުކުރި މެޗަށް ނިކުތީ މެޗު ކާމިޔާބު ކުރުމުން ނޫނީ މުބާރާތުގައި އިތުރަށް ކުރިޔަށް ނުދާނެކަމަށް ވިސްނައިގެންނެވެ. 

މެޗުގެ ފުރަތަމަ ހާފުގެ އިތުރު ވަގުތުގައި ފުރަތަމަ ލީޑު ނެގީ ކޭޕް ވާޑްއިންނެވެ. އިޖިޕްޓުން އެ ޓީމުގެ ކޮޅަށް މެޗު އަނބުރާލީ ދެވަނަ ހާފުގެ އިތުރު ވަގުތުގައެވެ. އެއީ 50 ވަނަ މިނެޓާއި، އިތުރު ވަގުތުގެ 3 ވަނަ މިނެޓުގައި ކާމިޔާބުކުރި ގޯލުތަކުންނެވެ. ނަމަވެސް މެޗު ނިމުމުގެ ކުރިން އިތުރު ވަގުތުގެ 9 ވަނަ މިނެޓުގައި ކޭޕް ވާޑްއިން ވަނީ އިތުރު ގޯލެއް ކާމިޔާބުކޮށް މެޗުގެ ނަތީޖާ ހަމަހަމަކޮށްފައެވެ.  

އިޖިޕްޓުގެ 3 މެޗު ވެސް 2-2 އިން އެއްވަރުވެ، ލިބުނު 3 ޕޮއިންޓާއެކީ ނޮކް އައުޓް ބުރަށް ދިއުމަށް އެހީވީ ރޭ ގާނާއާ ދެކޮޅަށް އިތުރު ވަގުތުގައި މޮޒަމްބިކް ކާމިޔާބު ކުރި ދެ ގޯލެވެ. މެޗުގެ 15 ވަނަ މިނެޓާއި 70 ވަނަ މިނެޓުގައި ލިބުނު 2 ޕެނަލްޓީއިން ގާނާ ދެ ގޯލުގެ ލީޑެއްގައި އޮއްވައި، މެޗުގެ އިތުރު ވަގުތުގައި 2 ގޯލު ކާމިޔާބުކޮށް، މޮޒަމްބިކުން ގްރޫޕުގެ އޮއިވަރު ބަދަލުކޮށްލިއެވެ. އެ ޓީމުގެ ފުރަތަމަ ގޯލު ކާމިޔާބުކުރީ އިތުރު ވަގުތުގެ ފުރަތަމަ މިނެޓުގައި ލިބުނު ޕެނަލްޓީއަކުންނެވެ. ދެވަނަ ގޯލު ކާމިޔާބުކުރީ އިތުރު ވަގުތުގެ 4 ވަނަ މިނެޓުގައެވެ. 

މުބާރާތް ބާއްވާ އައިވޮރީ ކޯސްޓަށް އަމިއްލަ ބާރު ގެއްލުނީ އެމީހުނަށް ވުރެން ފީފާ ވޯލްޑް ރޭންކިންގައި އެތައް ގުނައެއް ދަށުގައި އޮންނަ އިކުޓޯރިއަލް ގިނީ އަތުން ކުރިމަތިލާން ޖެހުނު ލަދުވެތި ބައްޔާއެކުއެވެ. ގުރޫޕުގެ ފަހު މެޗު އައިވޮރީ ކޯސްޓާ ބައްދަލުކޮށް އިކުޓޯރިއަލް ގިނީ ކާމިޔާބުކުރީ 4-0 އިންނެވެ. 

އައިވޮރީ ކޯސްޓަށް ދެން ޖެހޭނީ ގްރޫޕް ސްޓޭޖުގެ ހުރިހާ މެޗެއް ނިމެންދެން ބަލަން ތިބޭށެވެ. މި މުބާރާތުގައި ވާދަކުރާ ޓީމުތައް 6 ގްރޫޕަކަށް ބަހާލާފައިވާއިރު ކޮންމެ ގްރޫޕެއްގެ އެއްވަނަ އާއި ދެވަނަ ޓީމުގެ އިތުރުން، ގްރޫޕްތަކުގެ ތިން ވަނަ ޓީމުތަކުގެ ތެރެއިން އެންމެ ރަގަޅު ނަތީޖާއެއް ހޯދާފައިވާ 4 ޓީމެއްވެސް ނޮކް އައުޓް ބުރަށް ދަތުރުކުރާނެއެވެ.