ދިހަ އަހަރު ފަހުން، ހުޅުމާލޭ ވަގުތީ މިސްކިތުގެ ބަދަލުގައި ދާއިމީ މިސްކިތެއް އަޅަން ބަޔަކާއި ހަވާލުކޮށްފިއެވެ.

އެޗްޑީސީން ވިދާޅުވީ، ހުޅުމާލެ ރެޑްވޭވް ސިޓީ ސްކޮއަރ ކައިރީގައި ހުންނަ ވަގުތީ މިސްކިތުގެ ބަދަލުގައި އެބިމުގައި ދާއިމީ މިސްކިތެއް އެޅުމުގެ މަސައްކަތާއި ހަވާލުވެފައި ވަނީ، އަލް މަދީނާ އިންވެސްޓްމެންޓް ޕްރައިވެޓް ލިމިޓެޑާއެވެ. އެމިސްކިތް އަޅާނީ، އެކުންފުނިން އަޅާ ސްކޫލު މަޝްރޫޢުގެ ތެރެއިން ސްކޫލާއި ގުޅިގެންދާ ގޮތަށެވެ. 

އަލް މަދީނާ އިންވެސްޓްމެންޓް ޕްރައިވެޓް ލިމިޓެޑްއާއިއެކު ހުޅުމާލޭގައި ސްކޫލެއް ތަރައްގީކުރުމަށް އެއްބަސްވުމެއްގައި އިއްޔެ ސޮއިކޮށްފައިވާއިރު އެޗްޑީސީގެ ފަރާތުން މި އެއްބަސްވުމުގައި ސޮއިކުރެއްވީ މި ކޯޕަރޭޝަންގެ މެނޭޖިންގ ޑިރެކްޓަރ އަލްފާޝިލް އިބްރާހިމް ފަޒުލް ރަޝީދެވެ. އަދި އަލް މަދީނާ އިންވެސްޓްމެންޓް ގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އަލްފާޟިލް އަލީ އަހްސަންއެވެ.

އަލް މަދީނާ އިންވެސްޓްމެންޓް ޕްރައިވެޓް ލިމިޓެޑްއާއިއެކު ހުޅުމާލޭގައި ސްކޫލެއް ތަރައްގީކުރުމަށް އެއްބަސްވުމެއްގައި ސޮއެކުރުން --

އެޗްޑީސީން ވިދާޅުވީ، ރެހެންދި ސްކޫލާއި، ހުުޅުމާލެ ރެޑްވޭވް ސްކޮޔާ އާއި ދެމެދު އޮތް ބިމުގައި އަލަށް އަޅާ މި ސްކޫލްގައި 2.5 އަހަރުގެ ތެރޭގައި ޕްރީސްކޫލްގެ ދަރިވަރުންނަށް ކިޔަވައި ދޭންފެށޭނެ ކަމަށެވެ. އަދި އެއަށްފަހު ގްރޭޑް 1-10 ގެ ދަރިވަރުންނަށް ކިޔަވައިދެވޭ ފެންވަރަށް އަދި އޭގެ އިތުރުން މަތީ ތައުލީމު އުނގަންނައިދެވޭ ފެންވަރަށް މި ސްކޫލް ތަރައްގީ ކުރެވިގެންދާނެ ކަމުގައިވެސް އެޗްޑީސީން ވިދާޅުވެއެވެ.

މި ސްކޫލުގެ މައިގަނޑު ބޭނުމަކީ ދަރިވަރުންނަށް ފުރިހަމަ އިސްލާމީ ތަޢުލީމު އެންމެ ރަނގަޅު ގޮތުގައި ފޯރުކޮށްދިނުން ކަމަށާއި، އަދި މީގެ އިތުރުން މި ސްކޫލުއިން ފުދުންތެރިކަން ދަށް ކުދިންނަށާއި ހާއްސަ އެހީ އަށް ބޭނުންވާ ދަރިވަރުންނަށް ހިލޭ ކިޔެވޭނެ ގޮތް ހަމަޖެހިގެން ދާނެކަމުގައިވެސް އެޗްޑީސީން ވަނީ ވިދާޅުވެފައެވެ.