މާލެ އަތޮޅު ފުނަދޫގައި ހުރި އެސްޓީއޯގެ ފިއުލް ފާމް ބަދަލުކުރުމަށް ވަޒީރުންގެ މަޖިލީހުން އިއްޔެ ނިންމަވާފައި ވަނީ، ކ. ތިލަފުށި ކައިރީގައި އޮންނަ "މާގިރި" ނަމަކަށް ކިޔާ ކުޑަފަޅަކަށް ކަމުގައި، އިންފްރާސްޓްރަކްޗަރ މިނިސްޓަރ ޢަބުދުﷲ މުއްޠަލިބު ވިދާޅުވެއްޖެއެވެ.

މިނިސްޓަރ މިހެން ވިދާޅުވީ، މާގިރިފަޅަށް އެސްޓީއޯގެ ފިއުލް ފާމް ބަދަލު ކުރުމަށް ސަރުކާރުން ނިންމިކަން އިއްޔެ އިއުލާނު ކުރުމާއި އެކު ތިމާވެށި ޙިމާޔަތްކުރުމުގެ މަސައްކަތްކުރާ އަމިއްލަ ޖަމިއްޔާއެއް ކަމުގައިވާ އީކޯކެއާ މޯލްޑިވްސްއިން އެކަމާއި މެދު ކަންބޮޑުވުން ފާޅު ކުރުމާއި ގުޅިގެންނެވެ. 

މާލެ އަތޮޅު ޝެރަޓަން މޯލްޑިވްސް ފުލްމޫން ރިޒޯޓު ކައިރީގައިވެސް، "މާގިރިފަޅު" ކިޔާފަޅެއް އޮންނައިރު އެފަޅަކީ، މާލެ އަތޮޅުގެ މުހިއްމު ޑައިވް ޕޮއިންޓެކެވެ. އަދި ސަރުކާރުގެ ނިންމުން ހާމަކުރި އިރު، މާލެ އަތޮޅުތެރެއިން ފިއުލްފާމް ބަދަލުކުރުމަށް ނިންމިފަޅާއި ގުޅޭ ގޮތުން ތަފްސީލް ދީފައި ނުވާތީ އެކަމުގެ އޮޅުންތައް ވަނީ އަރާފައެވެ.

އީކޯ ކެއާ މޯލްޑިވްސްއިން ވަނީ، އެރި އޮޅުންތައް ސާފުކޮށްދެއްވީތީ، މިނިސްޓަރަށް ޝުކުރުއަދާކުރައްވާފައެވެ. އެހެން ނަމަވެސް އެފަޅުގެ ބަދަލުގައިވެސް ކ. ތިލަފުށީގައި އެސްޓީއޯގެ ފިއުލްފާމް ހެދުމަށް އެދޭ ކަމުގައި އިކޯކެއަރ މޯލްޑިވްސްއިން ވަނީ ބުނެފައެވެ.

ޢުމުރާނީ ތަރައްޤީގެ މަޝްރޫއުތަކާއި އެކު ރާއްޖޭގެ ގުދުރަތީ ވެއްޓަށާއި ފަޅުތަކާއި ފަރުތަކަށް ލިބެމުން އަންނަ ގެއްލުންތަކާއި ގުޅިގެން އެފަދަ ތަރައްޤީގެ މަޝްރޫޢުތައް ހިންގުމާއި ދެކޮޅަށް އީކޯކެއަރ މޯލްޑިވްސްއިން އަންނަނީ އަޑު އުފުލަމުންނެވެ.