ދިވެހި ސިފައިންގެ ވަޒީފާއަށް ވަނުމަށް ބޭނުންވާ ފަރާތްތަކަށް އެފުރުޞަތު ޑިފެންސް މިނިސްޓްރީން އިއްޔެ ހުޅުވާލައިފިއެވެ.

ސިފައިންގެ ވަޒީފާއަށް އެދޭ ފަރާތްތަކުން، ސިފައިންގެ ވަޒީފާއަށް އެދޭ ފޯމާއި، އެހެނިހެން ލިޔެކިޔުންތަކާއިއެކު، 2024 ފެބުރުވަރީ 15 ވަނަ ދުވަހުގެ 14:00 ގެ ކުރިން ހުށައެޅުމަށް ޑިފެންސް މިނިސްޓްރީން ވަނީ އެދިފައެވެ.

އެމިނިސްޓްރީން ހާމަކޮށްފައިވާ ގޮތުގައި، ސިފައިންގެ ވަޒީފާއަށް އެދޭ ފޯމް، ޑިފެންސް މިނިސްޓްރީ އާ އެމްއެންޑީއެފްގެ ވެބްސައިޓުން އަދި ދިވެހި ސަރުކާރުގެ ގެޒެޓުން ޑައުންލޯޑް ކުރެވޭނެއެވެ. އަދި މާލޭގައި ހުންނަ ސިފައިންގެ މައިމަރުކަޒުންނާއި އަތޮޅުތަކުަގައި ހުރި އެމްއެންޑީއެފްގެ ސަރަޙައްދީ ކޮމާންޑް ސެންޓަރު ތަކުންނާއި އޮންލައިންކޮށް އަދި އީމެއިލްގެ ޒަރީޢާއިންވެސް ފޯމު ބަލައިގަންނާނެއެވެ.

ސިފައިންގެ ވަޒީފާއަށް ވަނުމަށް އެދޭ ފަރާތްތަކުގެ ކިބައިގައި ފުރިހަމަވާންޖެހޭ ޝަރުޠުތަކުގެ ތެރޭގައި:

- ދިވެހި ރައްޔިތެއް ކަމުގައިވުން.

- އުމުރުން 18 އަހަރު ފުރި 25 އަހަރު ނުފުރޭ މީހަކު ކަމުގައިވުން.

- ސިފައިންގެ ވަޒީފާ އަދާކުރެވޭފަދަ ޞިއްޙަތެއްގައި ހުރިމީހަކު ކަމުގައިވުން.

- ވޭތުވެދިޔަ 5 އަހަރު ދުވަހުގެތެރޭގައި ކުށުގެރެކޯޑެއް އޮތްމީހަކުކަމުގައި ނުވުން.

- ސިޔާސީ ޕާޓީއެއްގެ މެމްބަރެއްކަމުގައި ނުވުން. ؛ ހިމެނެއެވެ.

ސިފައިންގެ ވަޒީފާއަށް ހޮވޭ ފަރާތްތަކަށް އަސާސީ ތަމްރީން ކޯސް ފުރިހަމަކުރުމާއި ހަމައަށް މުސާރައާއި އެލަވެންސްގެ ގޮތުގައި -/12400 ރުފިޔާ ލިބޭނެ ކަމަށާއި، އަދި އަސާސީ ތަމްރީން ކޯސް ފުރިހަމަކުރުމުން މުސާރައާއި އެލަވަންސްގެ ގޮތުގައި -/15500 ރުފިޔާ އާއި މަސައްކަތް ކުރާ ދާއިރާއެއްގެ ގޮތުން ހަމަޖެހިފައިވާ އިތުރު އެލަވަންސްތައް ލިބޭނެކަމުގައިވެސް ޑިފެންސް މިނިސްޓްރީ ހާމަކޮށްފައި ވެއެވެ.