ސްޕެނިޝް ލީގުގައި ރޭ ޖިރޯނާ އާއި ސެވިއްޔާ ބައްދަލުކުރި މެޗުގައި ޖިރޯނާގެ ޔުކްރެއިން ފޯވާޑް، އާޓެމް ޑޮވްބީކް ހަތް މިނެޓުން ހެދި ހެޓްރިކާއެކު، 5-1 އިން ސެވިއްޔާ ބަލިކޮށް، އެ ޓީމުން އަނބުރާ ލީގު އެއްވަނައަށް އަރައިފިއެވެ.

ރޭ އިރާކޮޅު، ލީގުގެ ފުލުގައި އޮތް އަލްމެއިރާއާ ދެކޮޅަށް މެޑްރިޑުން ބައްދަލުކުރި މެޗުގައި، އަލްމެއިރާ ދެ ގޯލުގެ ލީޑެއް ނަގާފައިވަނިކޮށް ފަހަތުންއަރާ މެޑްރިޑުން ވަނީ މެޗު ކާމިޔާބުކޮށްފައެވެ. މެޗުން މޮޅުވި ގޯލު، އިތުރު މިނެޓުގެ 8 މިނެޓު ކުޅެފައި ވަނިކޮށް ކާމިޔާބުކޮށްދިނީ ޑެނީ ކާވަހާލްއެވެ. 

ސެވިއްޔާއާ ދެކޮޅަށް ހޯދި ތިން ޕޮއިންޓާއެކު ޖިރޯނާ ލީގު އެއްވަނައިގައި އޮތީ އެއް ޕޮއިންޓުގެ ލީޑަކާއެކުއެވެ. ނަމަވެސް ޖިރޯނާއަށް ވުރެން މެޑްރިޑުން އެއް މެޗު މަދުން ކުޅެފައިވުމުން، ދެ ޕޮއިންޓުގެ ލީޑަކާއެކު ލީގުގެ އެއްވަނައަށް އެރުމުގެ ފުރުސަތު މެޑްރިޑަށް ބޮޑެވެ.

ޖިރޯނާ މެޗުގައި ފުރަތަމަ ލީޑު ނެގީ މެޗުގެ 10 ވަނަ މިނެޓުގައި ރޮމެރޯ ކާމިޔާބުކުރި ގޯލަކާއެކު ސެވިއްޔާއެވެ. ޖަވާބުގައި ޑޮވްބީކް ވަނީ މެޗުގެ 20 މިނެޓު ކުޅުމުގެ ކުރިން ހެޓްރިކެއް ހަދާ، މެޗުގެ ނަތީޖާ އެ ޓީމުގެ ކޮޅަށް އަނބުރާލާފައެވެ. ޖިރޯނާގެ ހަތަރު ވަނަ ގޯލާއި ފަސްވަނަ ގޯލު ކާމިޔާބުކުރީ މެޗުގެ 56 ވަނަ މިނެޓާއި 89 ވަނަ މިނެޓުގައު ސިގަންކޯވް އާއި ސްޓުއާނީއެވެ. 

މި މެޗުގައި ކާމިޔާބު ކުރި ގޯލާއެކު ޑޮވްބީކް މިވަނީ މިހާތަނަށް ލީގުގައި 14 ގޯލު ހަމަކޮށްފައެވެ. ދެން މި އަދަދަށް ގޯލު ޖަހާފައިވަނީ މެޑްރިޑްގެ ޖޫޑް ބެލިންގްހަމްއެވެ.