Advertisement
އިއްޔެ ބޭއްވި ވަޒީރުންގެ މަޖިލީހުގެ ބައްދަލުުމުގެ ގެތެރެއިން --
އަރބަން ސެންޓަރުތައް ކަނޑައެޅުމަށް ބޭނުންވާ ސިޔާސަތުތައް އެކުލަވައިލަނީ
ދިވެހިރާއްޖޭގައި ތަރައްޤީގެ ސަރަހައްދުތަކާއި އަރބަން ސެންޓަރުތައް ކަނޑައެޅުމަށް ބޭނުންވާ ސިޔާސަތުތައް އެކުލަވައިލުމަށް ވަޒީރުންގެ މަޖިލީހުގެ ލަފާފުޅާއެކު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނިންމަވައިފިއެވެ.
ރައީސުލްޖުމްހޫރިއްޔާގެ އޮފީހުން ވިދާޅުވީ، ވަޒީރުންގެ މަޖިލީހުން އެނިންމެވުން ނިންމަވާފައި ވަނީ އިއްޔެ ބޭއްވި ވަޒީރުންގެ މަޖިލީހަށް، މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓުން ހުށައެޅުއްވި ކަރުދާހަށް މަޝްވަރާކުރެއްވުމަށް ފަހުގައި ކަމަށެވެ.
ވަޒީރުންގެ މަޖިލީހުގެ މައުލޫމާތު މީޑިއާތަކާއި ހިއްޞާކުރައްވަމުން ރައީސުލްޖުމްހޫރިއްޔާގެ އޮފީހުގެ ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމް އިބްރާހިމް ވިދާޅުވީ، އިއްޔެ ކެބިނެޓުގައި އެންމެ ގިނަ އިރު މަޝްވަރާކުރުވެނީ އެކަރުދާހަށް ކަމަށެވެ. މިގޮތުން ދެ ގަޑިއިރަށްވުރެ ގިނައިރު، ވަޒީރުން އެކަރުދާހާއި ގުޅޭ ގޮތުން މަޝްވަރާތައް ކުރެއްވި ކަމުގައި އޭނާ ވިދާޅުވިއެވެ.
ނާޒިމް ވިދާޅުވީ، އާބަން ސެންޓަރުތައް ޤާއިމްކުރެއްވުމަށް ނިންމަވާފައި ވަނީ، 3 ދަރަޖައަކަށް ގިންތި ކުރައްވައިގެން ކަމަށެވެ. އަދި ވަކިވަކި އަރބަން ރީޖަންތަކާއި އަދި އަރބަން ސެންޓަރުތައް ކަނޑައެޅުއްވުމަށްޓަކައި، ހެއްކާއި ޑޭޓާ ބޭނުން ކޮށްގެން ތަފްސީލީ ސްޓަޑީ ހަދައި، ކަމާބެހޭ ފަރާތްތަކާ މަޝްވަރާކޮށްގެން ކުރިއަށްގެންދެވުމާއި، އަރބަން ޑިވެލޮޕްމަންޓް ރީޖަންއެއްގައި ހުންނަންވާ ސިފަތައް ނުވަތަ ކްރައިޓީރިއާތަކާއި ލެވަލްތައް ކަނޑައެޅުމާއި ގުޅޭ ގޮތުން އިއްޔެ ބޭއްވި ވަޒީރުންގެ މަޖިލީހުގައި މަޝްވަރާކުރައްވާފައިވާ ކަމަށް ނާޒިމް ވިދާޅުވިއެވެ.
ރާއްޖޭގެ އަތޮޅުތަކުން ކަނޑައެޅޭ ވަކި ސަރަހައްދުތަކާއި ރަށްތައް އާބަން ސެންޓަރުތަކުގެ ގޮތުގައި ތަރައްޤީ ކުރެއްވުމަކީ ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒުގެ ރިޔާސީ ވަޢުދެކެވެ.
