އަފްޣާނިސްތާނުގެ ހިންދުކުޝް ފަރުބަދަމަތީ ސަރަހައްދަކަށް ވެއްޓުނު ކުޑަ މަތިންދާ ބޯޓަކީ، އިންޑިއާގެ ބޯޓެއް ނޫންކަމަށް އިންޑިއާގެ ރަސްމީ ފަރާތްތަކުން ބުނެފިއެވެ.

އިއްޔެ ހެނދުނު އަފްޣާނިސްތާނުގެ ތެރެއަށް ވެއްޓުނު ކުޑަ މަތިންދާބޯޓަކީ، ދިއްލީން މޮސްކޯއަށް ދަތުރުކުރި އިންޑިއާގެ ފްލައިޓެއް ކަމުގައި ބެލެވޭ ކަމަށް އަފްޣާނިސްތާނުން ރިޕޯޓްކުރިއެވެ. އެކަމާއި ގުޅިގެން އިންޑިއާގެ ސިވިލްއޭވިއޭޝަން މިނިސްޓްރީން ބުނީ ވެއްޓުނު އެބޯޓަކީ، އިންޑިއާގެ ބޯޓެއް ނޫންކަމަށާއި އެއީ މޮރޮކޯގެ މަތިންދާ ބޯޓެއް ކަމަށެވެ.

ރަޝިއާގެ އޭވިއޭޝަން އޮފިޝަލުން މިއަދު ބުނީ ހަ މީހުންނާއެކު ރަޝިއާގައި ރަޖިސްޓްރީކޮށްފައިވާ މަތިންދާބޯޓެއް ރާޑަރަށް ގެއްލުނީ އަފްޣާނިސްތާނުގެ ފަރުބަދަތައް މަތިން ބޯޓު ދަތުރު ކުރަނިކޮށެވެ.

ރަޝިއާގެ އޭވިއޭޝަން އޮތޯރިޓީން ނެރުނު ބަޔާނެއްގައި ބުނެފައިވަނީ އެ މަތިންދާބޯޓަކީ 1978 ވަނަ އަހަރު އުފައްދާފައިވާ، ފްރާންސްގެ ޑަސޯލްޓް ފެލްކަން 10 ގެ ޗާޓަރު އެމްބިއުލާންސް ފްލައިޓެއް ކަމަށެވެ. އެބޯޓު ދަތުރުކުރީ، އިންޑިއާއިން އުޒްބެކިސްތާން މަގުން މޮސްކޯއަށް ކަމަށްވެސް ރަޝިއާގެ އޭވިއޭޝަން އޮތޯރިޓީން ވަނީ ބުނެފައެވެ.

މިފްލައިޓް ވެއްޓިފައި ވަނީ، އަފްޣާނިސްތާނުގެ ބޯޑަރުގައި އޮންނަ ބަޑަޚްޝަން ޕްރޮންވިންގެ ސަރަހައްދަށެވެ. އެހެން ނަމަވެސް ފްލައިޓް ވެއްޓުނު ސީދާ ތަން އަދި ދެނެނުގަނެވޭކަމަށް ރަޝިއާގެ އޭވިއޭޝަން ޑިޕާޓްމެންޓުން ވަނީ ބުނެފައެވެ.