ރިޔާސީ އިންތިޚާބުގެ ކެމްޕޭނުގައި އައްޑޫގެ ރައްޔިތުންނަށް އަޅުއްވައި ދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޢުދުވެވަޑައިގެންނެވި، އައްޑޫ ބުރިޖު އަޅައިދިނުމަށް، މިސްރުގެ ކުންފުންޏަކުން ޝައުޤުވެރިކަން ފާޅުކޮށްފައިވާ ކަމުގައި ރައީސުލްޖުމްހޫރިއްޔާގެ އޮފީހުން ވިދާލުވެއްޖެއެވެ. 

މިއަދު ބޭއްވި ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާގެ އޮފީހުގެ ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމް އިބްރާހީމް ވިދާޅުވީ، މިސްރުގެ އަރަބް ކޮންޓްރެކްޓާސް ގްރޫޕުން އެބުރިޖް އަޅައިދިނުމުގެ ޝައުޤުވެރިކަން ފާޅުކޮށްފައިވާ ކަމަށެވެ. އެހެންވެ އެބުރިޖު އެޅުމާއި ގުޅޭ ސާވޭތައް އެކުންފުންޏާއި އެކު ކުރިޔަށް ގެންދިޔުމަށް ނިންމާފައިވާ ކަމުގައިވެސް ނާޒިމް ވިދާޅުވިއެވެ. ނާޒިމް ވިދާޅުވީ، އައްޑޫ ބުރިޖު އެޅުމާއި ގުޅޭ ކަންކަމުގައި މިއަދު ބޭއްވި އިކޮނޮމިކް ކައުންސިލްގައިވެސް މަޝްވަރާކުރައްވާފައިވާ ކަމަށެވެ.

ނާޒިމް ވިދާޅުވީ، އައްޑޫ ބުރިޖު އެޅުމާއި ގުޅޭ ސާވޭތައް އެކުންފުނިން ހިލޭކޮށްދޭނެ ކަމުގެ އިޝާރާތެއްކޮށްފައި ވާތީ، ހިލޭ އެމަސައްކަތްކޮށްދޭން އެކުންފުނިން ތައްޔާރުނަމަ، އެކުންފުންާޏާއި އެކު ބުރިޖު އެޅުމާއި ގުޅޭ ސާވޭތަކާއި ގުޅޭ މަޝްވަރާތައް ފެށުމަށްވެސް އިކޮނޮމިކް ކައުންސިލުން ނިންމާފައިވާކަމަށެވެ. 

އައްޑޫ ސިޓީގެ ވަކިން އޮންނަ ހުޅުމީދޫ އޮންނަނީ އިރުމަތީ ބިތުގައި ކަމަށް ވާއިރު ހުޅަނގު ބިތުގައި އޮންނަ ހިތަދޫއާއި ހުޅުމީދޫއާ ދެމެދު 9 މޭލު ހުރެއެވެ. އަދި ހުޅުމީދޫ އާއި އައްޑޫގެ ގުޅިފައިވާ ރަށްތަކާއި އެކު ދެކުނު ބިތުގައި އޮންނަ ގަމާއި ދެމެދު 4 މޭލު ދުރުމިން ހުރެއެވެ. އައްޑޫގެ ކޮންމެ ފަރާތަކުން މިރަށްތަށް ގުޅާލަން ނިންމި ނަމަވެސް މަދުވެގެން ދެ ކޯޒްވޭ މަގާއި ކަނޑުއޮޅިތައް ހުރަސްކޮށް ދެ ބުރިޖް އަޅަން ޖެހޭނެއެވެ. ކޯޒްވޭތަކާއި ހައިވޭތަކާއި އެކު ގުރޭޓާ މާލެ ކަނެކްޓިވިޓީ ބްރިޖުގެ ޖުމުލަ ދިގުމިނަކީ، 3.4 މޭލެވެ. ސިނަމާލެ ބުރިޖުގެ ދިގުމިނަކީ، 0.91 މޭލެވެ. އެހެންކަމުން އައްޑޫ ބުރިޖުވެގެންދާނީ މިހާތަނަށް އެޅޭ އެންމެ ދިގު ބުރިޖަށެވެ.