މާލޭގައި ބުޅާ ގިނަވެ އާއްމު އުނދަގުލަކަށްވެ ރައްޔިތުން އެކަމުގެ ޝަކުވާ ކުރަމުންދާއިރު، ބުޅާ ފެސިލިޓީ ޤާއިމްކޮށް ހިންގާނީ، މާލެ ސިޓީ ކައުންސިލާއި އެގްރިކަލްޗާ އެންޑް އެނިމަލް ވެލްފެއާ މިނިސްޓްރީއާ ދެމެދު ސޮއި ކުރާ އެއްބަސްވުމެއްގެ ދަށުން ކަމުގައި ސަރުކާރުން ހާމަކޮށްފިއެވެ.

ރައީސުލްޖުމްހޫރިއްޔާގެ އޮފީުގައި ބޭއްވި ނޫސްވެރިންގެ ބައްދަލުވުމުގައި، އެ އޮފީހުގެ ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމް ވިދާޅުވީ، ސަރުކާރުން މިހާރު ނިންމާފައި ވަނީ، ހުޅުމާލެ ދެވަނަ ފިޔަވަހީގެ ބިމާއި އެއްކޮށްލާފައިވާ ކުރީގެ ރިޒޯޓު ފަރުކޮޅުފުށީގައި ކެޓް ސެންޓަރެއް އެޅުމަށް ކަމަށެވެ. އަދި އެކަމަށްޓަކައި ފަރުކޮޅުފުށިން މިހާރު ބިންވެސް ހަމަޖެހިފައިވާ ކަމުގައި ނާޒިމް ވިދާޅުވިއެވެ.

ނާޒިމް ވިދާޅުވީ، މާލޭގެ މަގުތަކުގައި އުޅޭ ބުޅާތައް އެތަނަށް ގެންގޮސް ކެޓް ޝެލްޓާގެ ޚިދުމަތްދޭނީ، މާލޭ ސިޓީ ކައުންސިލާއި، އެގްރިކަލްޗާ އެންޑް އެނިމަލް ވެލްފެއާ މިނިސްޓްރީ ގުޅިގެން ކަމަށެވެ.

މާލޭގައި އުޅޭ ބުޅާތަކަށް ކެޓްފެސިލިޓީއެއް ޤާއިމްކުރުމަކީ، ރައީސުލްޖުމްހޫރިއްޔާ ޑޮކްޓަރ މުހައްމަދު މުޢިއްޒު މާލޭގެ މޭޔަރު ކަމުގައި ހުންނެވި އިރުން ފެށިގެން ދައްކަވަމުން ގެންދެވި ވާހަކަފުޅެވެ. އެންމެ ފުރަތަމަ ވިލިމާލޭގައި ބުޅާތަކަށް ޚާއްސަ ފެސިލިޓީއެއް ޤާއިމްކުރެއްވުމުގެ ވާހަކަފުޅު ދެއްކެވި އިރު، ފަހުން މާލޭގައިވެސް އެފަދަ ފެސިލިޓީއެއް ޤާއިމްކުރުމުގެ ވާހަކަފުޅު ދެއްކެވިއެވެ.

މާލޭގައި ދިރިއުޅޭ ރައްޔިތުންގެ ކަންބޮޑުވުންތަކަށް ހައްލު ހޯއްދަވައި ދެއްވުމުގެ ގޮތުން މާލޭގެ މަގުތަކަށް ގިނަވެގެން އުޅޭ ބުޅާތަކަށް ކެޓް ފެސިލިޓީއެއް ތަރައްޤީކޮށްދެއްވުމަކީ، މާލޭ ސިޓީގެ މޭޔަރުގެ މަޤާމަށް އިންތިޚާބުވެވަޑައިގެންފައިވާ، އެމްޑީޕީގެ މެމްބަރު އާދަމް އާޒިމްވެސް ވައުދުވެވަޑައިގެންފައިވާ ކަމެކެވެ.