އެސްޓީއޯއިން މާލެ އަތޮޅު ފުނަދޫގައި، ޤާއިމްކޮށްފައިވާ ފިއުލް ފާމް ކ. މާގިރިފަޅަށް ބަދަލުކުރުމަށް ސަރުކާރުން ނިންމައިފިއެވެ.

މިކަން ހާމަކުރެއްވީ، މިއަދު ބޭއްވި ވަޒީރުންގެ މަޖިލީހުގެ ބައްދަލުވުމަށްފަހުގައި، ނޫސްވެރިންނަށް މައުލޫމާތު ދެއްވަމުން، އޮފީހުގެ ޕަބްލިކް ޕޮލިސީ ސެކްރެޓަރީ އަބްދުالله ނާޒިމް ވިދާޅުވީ، ފުނަދޫގައި ހުރި ފިއުލްފާމް މާގިރިފަޅަށް ބަދަލުކުރުމަށް ނިންމާފައި ވަނީ އެކަމާއި ގުޅޭ ގޮތުން އިކޮނޮމިކް ކައުންސިލްގައި މަޝްވަރާކުރާކުރުމަށް ފަހުގައި ކަމަށެވެ. ފިއުލްފާމް ބަދަލުކުރުމުގެ މައްސަލަ އިކޮނޮމިކް ކައުންސިލަށް ފޮނުއްވާފައި ވަނީ، ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)އިންނެވެ. 

މާގިރިފަޅަށް އެސްޓީއޯގެ ފިއުލްފާމް ބަދަލުކުރުމަށް އިކޮނޮމިކް ކައުންސިލުން ނިންމި އިރު އެފަޅަކީ، ނިމިދިޔަ ސަރުކާރުން އެޗްޑީސީއަށް ދީފައިވާ ފަޅެކެވެ. އެހެން ނަމަވެސް އެކަމަށް އައި ބަދަލެއް ސަރުކާރަކުން ހާމައެއް ނުކުރައްވައެވެ.

މިސަރުކާރުން ވަނީ، ފުނަދޫ ހުސްކޮށް އެރަށަކީ، ސްޕެޝަލް އެކޮނޮމިކް ޒޯނަކަށް ހެދުމަށާއި އެރަށުގައި އިންޓަރނޭޝަނަލް ފައިނޭންޝަލް ސެންޓަރެއް އެޅުމަށް ނިންމާފައެވެ. އަދި މިއަދު ރައީސުލްޖުމްހޫރިއްޔާ ވަނީ، "މޯލްޑިވްސް އިންޓަރނޭޝަނަލް ފައިނޭންޝަލް ސަރވިސަސް އޮތޯރިޓީ"އެއްވެސް އުފައްދާފައެވެ.

ފުނަދޫ ހުސްކުރުމަށް އެސްޓީއޯއިން ހުށައެޅި އިރު، އެރަށަކީ، އެސްޓީއޯއިން ތެޔޮ ރައްކާކުރާ މައި ސްޓޯރޭޖް ހުރި ރަށެވެ.