Advertisement
ރައީސުލްޖުމްހޫރިއްޔާ އުކުޅަހަށް ވަޑައިގެންނެވުން ---
ރައީސް އުކުޅަހަށް ވަޑައިގެންފި
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ރަސްމީ ދަތުރުފުޅެއްގައި މިއަދު ހަވީރު އުކުޅަހަށް ވަޑައިގެންފިއެވެ.
ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި ރައީސުލްޖުމްހޫރިއްޔާ މިއަދު އުކުޅަކަށް ފެއްޓެވި މިދަތުރުފުޅަކީ، މިއަދު ފާހަގަކުރާ ދުނިޔޭގެ ތިމާވެށީގެ ދުވަހުގެ ހަރަކާތްތަކުގައި ބައިވެރިވެވަޑައިގެންނެވުމަށް ކުރައްވާ ދަތުރުފުޅެކެވެ. މިއަހަރުގެ ތިމާވެށީގެ ދުވަސް ޤައުމީ ފެންވަރުގައި ރަސްމީ ގޮތުން ފާހަގަކުރައްވަނީ، އަރިއަތޮޅު އުތުރުބުރީ އުކުޅަހުގައެވެ.
ރައީސުލްޖުމްހޫރިއްޔާ އުކުޅަހަށް ވަޑައިގެންނެވުމުން އެރަށުގެ ރައްޔިތުން ވަނީ އެމަނިކުފާނަށް ހޫނު މަރުހަބާއެއް ދަންނަވާފައެވެ.
އުކުޅަހަށް އެންމެ ފުރަތަމަ ވަޑައިގެން އެރަށުގައި ހަވީރު ކުރިޔަށް ދިޔަ، 'ބީޓް ޕްލާސްޓިކް ޕޮލިއުޝަން' ފެސްޓިވަލް ރައިސުލްޖުމްހޫރިއްޔާ ވަނީ ބައްލަވާލައްވާފައެވެ. އަދި ދުނިޔޭގެ ތިމާވެށީގެ ދުވަސް ފާހަގަކުރުމުގެ ގޮތުން މިރޭ އުކުޅަހުގައި ބާއްވާ ރަސްމީ ޖަލްސާގައި އެމަނިކުފާނު ބައިވެރިވެވަޑައިގަންނަވާނެކަމުގައި ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވެއެވެ.
މީގެ އިތުރުން އއ. އުކުޅަހުގެ ކައުންސިލާ، އ.ތ.މ ކޮމިޓީއާވެސް ބައްދަލުކުރައްވައި ރަށުގެ ތަރައްޤީއާ ރައްޔިތުންގެ ކަންބޮޑުވުންތަކާއި ގުޅޭ ގޮތުން ރައީސުލްޖުމްހޫރިއްޔާ މަޝްވަރާ ކުރައްވާނެ ކަމުގައިވެސް ރައީސުލްޖުމްހޫރިއްޔާގެ އޮފީހުން ވަނީ ވިދާޅުވެފައެވެ.
