ފަރުވާ ލިބުން ލަސްވެ، ގއ. ވިލިނގިލީ، ޕެންޒީއާގޭ، މުޙައްމަދު ޖާހު ޚާލިދު (13އ) ނިޔާވި މައްސަލަ، އެދާއިރާގެ މަޖިލިސް މެމްބަރު ސަޢުދު ޙުސައިން، ރައްޔިތުންގެ މަޖިލީހަށް ހުށައަޅުއްވައިފިއެވެ.

13 އަހަރުގެ ކުޑަކުއްޖާ ނިޔާވީ، ސިއްޙީ އެމާޖެންސީ ކުއްލި ހާލަތުގައި، ގއ. އަތޮޅު ހޮސްޕިޓަލުން، މާލޭގައި ހުންނަ އައިޖީއެމް ހޮސްޕިޓަލަށް ރިފަރ ކުރުމުން، މާލެއަށް ގެނައުން ލަސްވެ އެކަށީގެންވާ ފަރުވާ ނުލިބުމުގެ ސަަބަބުން ކަމުގައި އާއިލާއިން ތުހުމަތުކޮށްފައިވެއެވެ. ކުއްޖާ މާލެ ގެނައުމަށް 12 ގަޑިއިރަށްވުރެ ގިނަ ވަގުތު ހޭދަވިއެވެ.

އެމައްސަލަ ރައްޔިތުންގެ މަޖިލީހުގެ ސަމާލުކަމަށް ގެނެސް، އެދާއިރާގެ މެމްބަރު ސަޢުދު ޙުސައިން ވަނީ، ރައްޔިތުންގެ މަޖިލީހުގެ ރައީސަށް އެޑްރެސްކުރައްވައި އިއްޔެ ސިޓީފުޅެއް ފޮނުއްވާފައެވެ.

އެސިޓީފުޅުގައި ސަޢުދު އެދިވަޑައިގެންފައި ވަނީ، ވިލިނގިލީގައި ދިމާވި މިހިތާމަވެރި ހާދިސާގައި، ދިވެހިރާއްޖޭގައި އެވަގުތާއި ހަމައަށް ލިބެންހުރި އެމާޖެންސީ އިވެކުއޭޝަން ވަޞީލަތްތައް ބޭނުން ނުކޮށް، ގަސްތުގައި  އަވަސް ފަރުވާއަށް މޭލެ ގެނައުން ލަސްވި މައްސަލަބަލައި ދިރާސާކޮށް، މިފަދަ ކަންކަން ޤައުމުގައި ތަކުރާރުވިޔަ ނުދިނުމަށް ސަރުކާރު ޖަވާބުދާރީ ކުރުވުމަށްޓަކައި، އެ ހާދިސާގައި އެކި މުއައްސަސާތަކުން ވެފައިވާ އިޙުމާލުތަށް ބެލުމަށް އެމައްސަލަ ރައްޔިތުންގެ މަޖިލީހުގެ ސަމާލުކަމަށް ގެންނަ ކަމަށެވެ.

އުމުރުން 13 އަހަރުގެ ކުޑަކުއްޖާ ބަލިވެގެން ގއ. އަތޮޅު ހޮސްޕިޓަލުގައި އެޑްމިޓް ކުރީ ޖެނުއަރީ 17ވީ ބުދަދުވަހުގެ ރޭ 9:00 ހާއިރުގައެވެ. ކުއްޖާ މާލެއަށް ގެނެވުނީ ޖެނުއަރީ 18ވީ ބުރާސްފަތި ދުވަހުގެ ހަވީރު 17:15ގައެވެ.

ނިޔާވި ކުޑަކުއްޖާ ރޭގެ މަޣުރިބު ނަމާދަށް ފަހު، ހުޅުމާލެ ސަހަރާގައި ވަނީ ވަޅުލާފައެވެ.