ފުވައްމުލަކު އެއާޕޯޓު ރަންވޭގެ އޮރިއަންޓޭޝަން ބަދަލުކޮށް ރަންވޭ ދިގުކުރުމާ ގުޅޭ ގޮތުން ފުވައްމުލަކު ސިޓީ ކައުންސިލާ އެކު ރީޖަނަލް އެއާޕޯޓްސް ކޮމްޕެނީ (އާރްއޭސީއެލް) އިން މަޝްވަރާ ކޮށްފިއެވެ.

ފުވައްމުލަކު އެއާޕޯޓު ބޮޑުކުރުމުގެ ޕްރޮޖެކްޓުގައި ރަންވޭ އޮރިއެންޓޭޝަން ބަދަލުކޮށް ޖެޓް ޖެއްސޭވަރަށް ރަންވޭ ބޮޑުކުރުމާއި، ޖެޓް ޕާކިންއަށް ހާއްސަކޮށް އޭޕްރަންގެ ޖާގެ އިތުރު ކުރުމާއި ޖެޓް ފިއުލް ލިބޭނެ އިންތިޒާމު ހަމަޖެއްސުން ހިމެނެއެވެ. އަދި ފްލައިން ސްކޫލެއް ގާއިމުކުރުންވެސް ހިމެނޭކަމަށް އާރްއޭސީއެލްއިން ވަނީ ބުނެފައެވެ.

އާރްއޭސީއެލް އިން ބުނީ ކައުންސިލާ އެކު ކުރި މަޝްވަރާގައި، އެއާޕޯޓުގެ ރަންވޭ ބޮޑުކުރެވެން ހުރި ގޮތްތަކުގެ މައުލޫމާތު ވަނީ ދީފައެވެ. އަދި އެއާޕޯޓު ތަރައްގީގެ މާސްޓާ ޕްލޭނާ ބެހޭގޮތުން ވެސް މަޝްވަރާކުރި ކަމަށް އާރްއޭސީއެލްއިން ބުންޏެވެ.

މީގެ އިތުރުން އެއާޕޯޓާ އިންވެގެން އޮންނަ ހުސްބިމުގައި ޓޫރިޒަމް ޒޯނެއް ހެދުމާ ބެހޭ ގޮތުން ވެސް މަޝްވަރާކުރި އެވެ.