ރަށު ކައުންސިލްތަކުގެ އިޙްތިސާސްއިން ބޭރުގައިވާ ފަޅުރަށްތަކާއި ފަޅުތައް ކައުންސިލްތަކަށް ދޫކުރެވޭ ގޮތަށް ގަވައިދެއް ހަދައި ގެޒެޓްކޮށްފިއެވެ.

އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ ދަށުން ރަށުކައުންސިލްތަކުގެ އިޙްތިޞާސް ހިމެނޭ ސަރަހައްދުތައް ކަނޑައަޅާފައިވާއިރު، ބައެއް ކައުންސިލްތަކުގެ އިޙްތިސާސްގެ ތެރޭގައި ފަޅެއް ނުވަތަ ފަޅުރަށެއް ނެތުމުގެ ޝަކުވާއަކީ ކައުންސިލްތަކުން ކުރަމުން އައި ޝަކުވާއެކެވެ. އެކަމަށް ޙައްލެއް ހޯއްދަވައި ދެއްވާނެ ކަމުގައި ރިޔާސީ އިންތިޚާބުގެ ކެމްޕޭންގައި ރަށްރަށަށް ކުރެއްވި ދަތުރުތަކުގައި ރައީސުލްޖުމްހޫރިއްޔާ ވަނީ ވިދާޅުވެފައެވެ.

ބުރާސްފަތި ދުވަހު، މިނިސްޓްރީ އޮފް ހައުސިން، ލޭންޑް އެންޑް އަރބަން ޑިވެލޮޕްމެންޓުން ވަނީ، މަސްވެރިކަމާއި ދަނޑުވެރިކަމާއި އިޤުތިޞާދީ ބޭނުންތައް ފިޔަވައި އެ ނޫން ބޭނުންތަކަށް ފަޅުރަށްރަށް ދޫކުރުމާބެހޭ ގަވާއިދު ގެޒެޓްކޮށްފައެވެ. އެޤަވާއިދުގައި ވާގޮތުން، ކައުންސިލްތަކުގެ އިހުތިސާސްގައި ނުހިމެނޭ ރަށެއް ނުވަތަ ފަޅެއް ދޫކުރާނީ ލޯކަލް ގަވަމަންޓު މިނިސްޓްރީންނެވެ. މިގޮތުން ކައުންސިލްތަކަށް ދޫކުރާނެ ފަޅުތަކާއި ރައްތައް ކަނޑައަޅުއްވާނީ ރައީސުލްޖުމްހޫރިއްޔާއެވެ.

އާޤަވާއިދުގައި ވަނީ، ކައުންސިލްތަކަށް ދޫކުރެވޭ ރަށްތަކާއި ފަޅުތައް ހޯދުމަށް އެއްކައުންސިލަށްވުރެ ގިނަ ކައުންސިލުން ބައިވެރިވެގެން ހުށައެޅޭ ގޮތަށްވެސް ހަމަޖައްސާފައެވެ. އަދި މިގޮތުން ކައުންސިލްތަކަށް ދޫކުރެވޭ ރަށްތަކާއި ފަޅުތަކުން ކުރެވޭ އިޤުތިޞާދީ މަސައްކަތްތަކާއި، ލިބޭ އާމްދަނީއާ ޚަރަދު ރިޕޯޓެއް ހުށައެޅުން ޤަވާއިދުގެ ދަށުން ލާޒިމްކޮށްފައި ވެއެވެ.

އައު ޤަވާއިދަށް ޢަމަލުކުރަން ފެށުމާއި އެކު، "މަސްވެރިކަމާއި ދަނޑުވެރިކަމާއި އިގުތިސޯދީ ބޭނުންތައް ފިޔަވައި އެ ނޫން ބޭނުންތަކަށް ފަޅު ރަށްރަށް ދޫކުރުމާ ބެހޭ ގަވާއިދު"ވަނީ އުވާލާފައެވެ.